Rusiya “əsrin müharibəsinə” hazırlaşır: Ukrayna ilə savaş yalnız ilk mərhələ imiş
Almaniya hərbi kəşfiyyatının yeni hesabatına görə, Rusiya 2022-ci ildən bəri hərbi gücünü 30-50% artırıb və bu, ölkənin NATO və Avropa dövlətlərinə qarşı genişmiqyaslı müharibəyə hazırlaşdığını göstərir. “Süddeutsche Zeitung”, WDR və NDR xəbər agentliklərinin apardığı birgə araşdırmaya əsasən, Moskva Ukraynadakı müharibəni yalnız ilk mərhələ kimi görür.
Crossmedia.az xəbər verir ki, bu barədə "The Jerusalem Post" yazıb.
Hesabatda vurğulanır ki, Prezident Vladimir Putin Rusiyanın imperialist məqsədlərinə çatmaq üçün hərbi gücdən istifadə etməyi planlaşdırır və Ukraynaya müdaxilənin Avropaya qarşı daha geniş hərbi planların başlanğıcı olduğu bildirilir. 2030-cu ilədək genişmiqyaslı müharibəyə zəmin hazırlanacaq. Alman mediası bildirir ki, onilliyin sonuna qədər Rusiya konvensional, yəni klassik silahlarla aparılacaq genişmiqyaslı bir müharibə üçün zəmin hazırlayacaq. Rusiya ordusunun istehsalı hazırda Ukraynadakı ehtiyacları aşacaq qədər artıb. Bu da Kremlin gələcək döyüşlərə hazırlaşdığını göstərir. Rusiya 2026-cı ilə qədər ordusunun sayını 1,5 milyon hərbçiyə çatdırmağı planlaşdırır. 2025-ci ildə isə ölkənin hərbi büdcəsi 120 milyard avroya çataraq ümumi daxili məhsulun 6%-dən çoxunu təşkil edir – bu, 2021-ci illə müqayisədə demək olar ki, 4 dəfə çoxdur.
Qeyd edək ki, NATO-nun yeni baş katibi Mark Rutte xəbərdarlıq edib ki, Rusiya Polşa və ya başqa bir Alyans ölkəsinə hücum edərsə, əks- hücumla üzləşəcək. O, həmçinin bildirib ki, Rusiya-Ukrayna müharibəsi başa çatdıqdan sonra Moskva ilə əlaqələrin normallaşması gözlənilmir. Litvanın xüsusi xidmətləri hesab edir ki, Rusiya hələ tammiqyaslı NATO müharibəsi aparmaq gücündə olmasa da, bəzi üzv ölkələrə qarşı məhdud hərbi əməliyyat keçirmə potensialına malikdir.
Qeyd edilir ki, hazırda Rusiya ordusunun 75%-ə yaxını Ukraynada döyüşür. Lakin müharibə bitərsə, bu qüvvələr sərhədlərə qayıda bilər və Baltikyanı ölkələrə təzyiq arta bilər. Almaniyanın BND kəşfiyyat xidməti isə bildirir ki, Putin NATO-nun 5-ci maddəsi çərçivəsində üzv ölkələrin bir-birini müdafiə etməyə nə qədər hazır olduğunu test etməyi planlaşdırır.
Xumar Emilqızı
18:35 06.04.2025
Oxunuş sayı: 11802
