ABŞ-də Trampa qarşı kütləvi etirazlar fonunda impiçment tələbi gündəmdədir
ABŞ-də davam edən genişmiqyaslı etiraz aksiyaları fonunda demokrat konqresmen El Qrin ABŞ Prezidenti Donald Trampın impiçmenti ilə bağlı təklif irəli sürəcəyini açıqlayıb. O, bu təklifi yaxın 30 gün ərzində Konqresə təqdim edəcəyini bildirib.
Crossmedia.az xarici KİV-ə istinadən xəbər verir ki, siyasətçi Trampın etimada və prezident vəzifəsinə layiq olmadığını qeyd edib.
Xatırladaq ki, son günlər ABŞ və Avropanın müxtəlif şəhərlərində Tramp və biznesmen İlon Maska qarşı kütləvi etiraz aksiyaları keçirilib. Aksiya iştirakçıları əsasən idxal rüsumlarının artırılması, miqrantlara qarşı sərt tədbirlər və kütləvi ixtisarlara etiraz ediblər. Mitinqlərin təşkilatçıları bildiriblər ki, əsas məqsədləri milyarderlərin hakimiyyəti ələ keçirməsinə son qoymaqdır.
Etiraz aksiyalarında minlərlə insan iştirak edib. ABŞ-nin müxtəlif ştatlarında – Kapitoli binalarının qarşısında, federal qurumların və Konqres üzvlərinin ofisləri önündə keçirilən aksiyalar geniş miqyas alıb. Vaşinqton polisi Ağ Evin qarşısındakı aksiyanın iştirakçı sayı ilə bağlı açıqlama verməkdən imtina edib.
Bildirilib ki, Ağ Ev yaxınlığında bir neçə kvartal boyunca “Əl çəkin demokratiyadan”! şüarı yazılmış böyük banner sərgilənib.
Etirazçılar “Mənim prezidentim deyil!”, “Faşizm gəldi”, “Şərə son qoyun!” və “Sosial təminatımızdan əl çəkin”! kimi şüarların yazıldığı plakatlar da daşıyıblar.
Qeyd edək ki, Trampın siyasətinə qarşı etirazlar Avropanın London, Roma və Paris şəhərlərində də baş tutub.
Fatimə Məmmədova
14:35 06.04.2025
Oxunuş sayı: 1577
