İranın dəstəklədiyi iraqlı milislər ABŞ qüvvələrinə hücumla hədələyir
İranın dəstəklədiyi İraq silahlı qruplaşmaları ABŞ-nin İraq və Suriyadakı qüvvələrinə qarşı hücumlarla bağlı təhdidlərini artırıblar.
Crossmedia.az xəbər verir ki, bu barədə ABŞ-nin Müharibə Araşdırmaları İnstitutu bildirib.
Ekspertlərə görə, bu təhdidlər həm Vaşinqtonun İrana qarşı mümkün hərbi əməliyyatlarının qarşısını almağa, həm də ABŞ qüvvələrinin İraqdan çıxmasını təmin etməyə yönəlib. Yeni yaradılmış “Hərəkat əl-Əştar” silahlı qrupu aprelin üçündə yayımladığı bəyanatda ABŞ qüvvələrinə qarşı “böyük sürprizlər” hazırladıqlarını bildirib və ABŞ texnikasını yandıracaqlarına söz verib. Fevral ayında yaradılmış digər İran yönlü qrup – “Amerika İşğalını Qovma Kampaniyası” da aprelin üçündə paylaşdığı videoda ABŞ qüvvələrini hədələyərək, “ABŞ yalnız alçaldılmış, məğlub və sarsılmış şəkildə geri çəkilməli olacaq” deyib.
Qeyd edək ki, İranın dəstəklədiyi daha böyük silahlı qruplaşma – “Hərəkat Hizbullah əl-Nucaba” isə martın 20-də dolayı yolla xəbərdarlıq edərək bildirib ki, ABŞ qüvvələri 2025-ci ilin sonuna qədər İraqdan çıxmasa, hücumlar bərpa ediləcək.
Bu təhdidlər İranın İsrail və ya ABŞ tərəfindən hücuma məruz qalmaq ehtimalı qarşısında göstərdiyi cavab strategiyalarına uyğun olaraq formalaşır. Milislər 2023-cü ilin oktyabrından 2024-cü ilin yanvarına qədər ABŞ qüvvələrinə qarşı hücumlar həyata keçirib. Lakin 2024-cü ilin yanvarından bu yana daha çox hədələrlə kifayətlənirlər. ABŞ və İraq 2024-cü ilin sentyabrında əldə etdikləri razılaşmaya əsasən, 2025-ci ilin sentyabrına qədər ABŞ liderliyindəki beynəlxalq koalisiya qüvvələrinin böyük hissəsi İraqı tərk edəcək, qalanları isə 2026-cı ilin sonuna qədər geri çəkiləcək. ABŞ qüvvələrinin regiondan çıxarılması İranın uzunmüddətli məqsədlərindən biri olaraq qalır.
Bildirək ki, Nəcəf şəhərində yaşayan şiə ruhanisi Sədrəddin əl-Qəbançi 4 aprel tarixində verdiyi moizədə ABŞ bazalarının İran və onun dəstəklədiyi milislərin hədəf dairəsində olduğunu bildirib. O, ABŞ Prezidenti Donald Trampa müraciət edərək müharibəyə başlamamaq və təhdid etməmək çağırışı edib. Qəbançi, İrana yaxın İraq şiə siyasi partiyalarından birinin üzvüdür və Muktəda əs-Sədr ilə əlaqələri mövcuddur. İranın hava hücumundan müdafiə qüvvələrinin rəhbərləri – general Əlirza Sabahi Fərd və SEPAH-ın Aerokosmik komandanı Əmir Əli Hacızadə aprelin dördündə Hörmüzgan vilayətində yerləşən Bəndər-Abbas hərbi bazasında hərbi hazırlıq yoxlaması keçirib. Bu səfər İranın ABŞ və İsraillə mümkün müharibə ehtimalına qarşı hava müdafiə sistemlərini gücləndirmək səylərinin tərkib hissəsi kimi qiymətləndirilir.
ABŞ rəsmiləri İranın nüvə proqramının tamamilə ləğvini hədəfləyən razılaşma üçün birbaşa danışıqlar axtarışındadır. Tramp aprelin üçündə verdiyi açıqlamada deyib ki, birbaşa danışıqlar daha sürətlidir. Lakin İran rəsmiləri dəfələrlə bu cür danışıqları rədd ediblər. Rejimə yaxın ekspertlərdən biri “The Atlantic” nəşrinə bildirib ki, Tehran əvvəlcə dolayı, sonra isə ehtimal ki, birbaşa danışıqlara keçid planı hazırlayır. İran rəsmisi Əli Əkbər Vilayəti aprelin dördündə Suriyanın müvəqqəti hökumətini Latakiyada baş verən zorakılıqlara və İsrailin hava hücumlarına laqeyd qalmaqda günahlandırıb. O, Suriya hökumətinin legitimliyini sual altına alaraq, dinc sakinlərin hədəfə alındığını iddia edib. Bu açıqlama İranın Suriya hökumətini zəiflətmək və beynəlxalq səviyyədə nüfuzdan salmaq cəhdlərinin bir hissəsi kimi dəyərləndirilir.
Xumar Emilqızı
23:55 05.04.2025
Oxunuş sayı: 1066
