Trampın açıqlaması milyarderləri 208 milyard dollar itirməyə səbəb oldu
ABŞ Prezidenti Donald Trampın gömrük rüsumları ilə bağlı verdiyi bəyanat qlobal iqtisadiyyatda zəlzələ effekti yaradıb. Onun açıqlamasından sonra dünyanın ən varlı 500 insanının ümumi sərvəti 208 milyard dollar azalıb. Bəs bu zərbədən kimlər necə təsirləndi?
Crossmedia.az “Haber Global”a istinadən kimlərin necə təsirləndiyini təqdim edir:
Mark Zukerberq- “Meta” şirkətinin təsisçisi bu günün ən böyük itirəni olub. Şirkətin səhmləri 9% ucuzlaşıb. Bu da Zukerberqə 17,9 milyard dollara, yəni şəxsi sərvətinin təxminən 9%-nə başa gəlib. Xatırladaq ki, “Meta” ilin əvvəlindən fevral ayına qədər bazarda əsas qaliblərdən biri idi və dəyərinə 350 milyard dollar əlavə etmişdi. Ancaq fevral ortasından bəri şirkətin səhmləri təxminən 28% dəyər itirib.
Ceff Bezos- “Amazon”un səhmləri cümə axşamı 9% ucuzlaşaraq son üç ilin ən kəskin enişini yaşayıb. Belə ki, bu eniş, şirkətin qurucusu Bezos-un sərvətindən 15,9 milyard dollar silib. Fevral ayındakı zirvə nöqtəsi ilə müqayisədə səhmlər 25%-dən çox dəyər itirib.
İlon Mask- “Tesla”-nın baş direktoru İlon Mask bu il ümumilikdə 110 milyard dollar itirib ki. Bunun 11 milyard dolları yalnız bu həftəyə aiddir. Gecikmiş çatdırılmalar və Trampın “effektivlik carçısı” kimi rolu “Tesla”-nın səhmlərinə mənfi təsir göstərib. ABŞ-də istehsal olunan “Tesla” avtomobilləri gömrük rüsumlarından daha az təsirlənsə də, cümə axşamı səhmlər yenə də 5.5% azalıb.
Ernest Qarsiya- Köhnə avtomobil satış şirkəti “Carvana”nın rəhbəri Qarsiyanın sərvəti 1,4 milyard dollar azalıb. Şirkətin səhmləri 20% dəyər itirib. Halbuki ötən ilin fevralına qədərki 12 ayda şirkət səhmləri 425%-dən çox artım göstərib.
Tobi Lütke- Kanadanın “Shopify” şirkətinin rəhbəri olan Lütke gömrük rüsumlarından ciddi zərər görənlərdəndir. Səhmlərin 20% dəyər itirməsi ilə onun sərvəti 1,5 milyard dollar və ya 17% azalıb. Şirkət gəlirlərinin böyük hissəsini idxal mallarının satışından əldə edir.
Bernar Arno-Avropa İttifaqının ABŞ-yə göndərilən mallara 20% gömrük vergisi tətbiq etməyə hazırlaşması Arno-nun lüks brendlərinə zərbə vurub. “Dior”, “Bulgari” və “Loro Piana” kimi markaların sahibi olan LVMH şirkətinin səhmləri ucuzlaşıb və Arno-nun sərvətindən 6 milyard dollar silinib.
Son olaraq Janq Sonqyuan- “ Huali Industrial Group”-un qurucusu Trampın Çin mallarına 34%-lik əlavə rüsum qərarından sonra 1,2 milyard dollar və ya sərvətinin 13%-ni itirib. “Nike”, “Lululemon” və “Adidas” kimi digər beynəlxalq brendlər də cənub-şərqi Asiyada istehsal zəncirləri olduğuna görə səhmlərində ciddi itkilər yaşayıb.
Fatimə Məmmədova
22:25 05.04.2025
Oxunuş sayı: 6452
