Beynəlxalq Mina Maarifləndirilməsi Günü: BMT qlobal fəaliyyətə çağırır
Birləşmiş Millətlər Təşkilatı (BMT), hər saat bir nəfərin mina və partlayıcı qurğular səbəbindən öldüyünü və ya yaralandığını bildirərək, bu məsələyə qlobal diqqət çəkməyə davam edir. BMT-nin məlumatına görə, minaya düşən qurbanların çoxu uşaqlardır.
Crossmedia.az xarici mediaya istinadən bildirir ki, Beynəlxalq Mina Maarifləndirilməsi Günündə müxtəlif assosiasiyalar daha geniş tədbirlər görülməsi üçün müraciətlər edib. Minalar, müharibənin partlayıcı qalıqları və əldəqayırma partlayıcı qurğular, xüsusilə silahlı münaqişələr zamanı ölüm və yaralanmalara səbəb olur.
Dünyanın 64 ölkəsində təxminən 10 milyon mina mövcud olduğu və hər il 2-5 milyon yeni mina qoyulduğu təxmin edilir. Afrika, minalardan ən çox təsirlənən qitə olsa da, Azərbaycan və Bosniya-Herseqovina kimi ölkələrdə də minalar böyük bir təhlükə təşkil edir.
Ukrayna da bu məsələdən ağır şəkildə təsirlənib. Təxminən üçdə biri minalanmış olan ölkə, sülh danışıqlarının tıxanması ilə qarşı-qarşıyadır. Ukraynanın təhlükəsizliyini təmin etmək üçün təqribən iki milyon mina və yüz minlərlə partlamamış raket, minaatan və qumbaraatanın zərərsizləşdirilməsi həyati önəm daşıyır.
Fatimə Nəbiyeva
20:50 05.04.2025
Oxunuş sayı: 10670
