"44 Days: Karabakh War" - Azərbaycanın oyun sənayesində dönüş nöqtəsi ola biləcək layihə
Azərbaycanlı gənclər tərəfindən hazırlanmaqda olan və yayımlanan ilk fraqmanı ilə diqqət çəkən "44 Days: Karabakh War", həm mövzusu, həm də texniki səviyyəsi ilə artıq böyük maraq doğurub.
Səkkiz nəfərlik komanda tərəfindən tamamilə yerli resurslarla hazırlanmış bu layihə, Qarabağ müharibəsini rəqəmsal müstəviyə daşıyaraq həm tarixi yaddaşın qorunmasına, həm də oyun sənayesində yerli imzanın formalaşmasına töhfə verməyi qarşısına məqsəd qoyub.
Layihənin əsas texniki bazasını Unreal Engine 5 təşkil edir. Bununla yanaşı, Squad Editor və süni intellekt əsaslı mühərriklərdən istifadə olunması oyunun dinamikasını və texnoloji səviyyəsini bir qədər də artırır. İstifadə olunan texnologiyalar, oyunun realistik görüntülər, ağıllı davranış sistemləri və çoxşaxəli oyun mexanikası ilə təqdim olunacağını göstərir.
Komandanın bildirdiyinə görə, oyunun əsas gücü onun hekayəsindədir. Hadisələr 1992-ci illərlə günümüz arasında paralel şəkildə cərəyan edir və əsas qəhrəmanın hekayəsi bu iki dövrün toqquşması fonunda inkişaf edir. Bununla belə, yalnız süjetə əsaslanmayan, zəngin oyun mexanikaları və funksional tapşırıqlar da oyunçular üçün önəmlidir və layihədə bu balans diqqətlə qorunur.
İlham mənbəyi kimi Arma və Call of Duty kimi beynəlxalq səviyyəli layihələri göstərən komanda, vizual və texniki baxımdan bəzi elementlərdə Call of Duty oyunlarının asetlərindən istifadə etdiklərini də qeyd edir. Bu yanaşma, beynəlxalq keyfiyyətdə, lakin lokal ruhda oyun yaratmaq niyyətini təsdiqləyir.
Maraqlıdır ki, layihə hər hansı dövlət və ya özəl qurumdan dəstək almadan, tamamilə freelans fəaliyyətlərdən əldə olunan gəlirlər hesabına maliyyələşdirilir. Komanda üzvləri bu layihəni, Azərbaycanda oyun sənayesinin formalaşması yolunda bir başlanğıc nöqtəsi kimi görür və gələcəkdə süni intellekt sahəsi ilə yanaşı, müxtəlif mövzularda yeni oyun layihələri ilə çıxış etməyi planlaşdırırlar.
Tapşırıq(misiya) dizaynında təkrarlara yol verilməməsi xüsusi diqqətə layiqdir. Komanda üzvləri bu məsələdə düzgün enteqrasiya və ideya üzərində aparılan davamlı iş sayəsində, bir çox beynəlxalq oyunlarda müşahidə edilən təkrarlanan və oyunçunu yoran missiyalardan uzaq durmağa çalışdıqlarını bildirirlər. Onlara görə, bu cür problemlər əsasən kommersiya maraqlarının ön planda tutulması nəticəsində yaranır.
Oyun struktur olaraq klassik lineer dəhliz modeli ilə deyil, "chapter" əsaslı və qismi açıq dünya yanaşması ilə hazırlanır. Bu isə oyunçunun həm hekayə xəttinə fokuslana bilməsinə, həm də müəyyən azadlıq çərçivəsində oyun aləmində sərbəst hərəkət etməsinə imkan verəcək.
"44 Days: Karabakh War" ilk mərhələdə yalnız kompüter və mobil platformalarda təqdim olunacaq. Mobil versiyada xüsusi “battleground” rejiminin mövcud olacağı açıqlanıb. Konsol versiyası isə planlaşdırılmır. Dil baxımından oyunun ilk versiyası Azərbaycan dilində dublaj, ingilis dilində altyazı ilə təqdim olunacaq. Gələcək yeniləmələrlə digər dillərin də əlavə olunması planlaşdırılır.
Layihənin ilk iki saatlıq demo versiyasının 8 noyabr 2025-ci il tarixində yayımlanması planlaşdırılır. Tam versiyada isə istifadəçiləri təxminən 32 saatlıq süjet əsaslı oyun təcrübəsi gözləyir. Bu isə təkcə yerli deyil, beynəlxalq oyun sənayesi üçün də əhəmiyyətli bir həcmdir.
Layihənin əsas heyətində Eldəniz Abbaszadə, Rəvan Duman, Hüseyn İsmayılzadə, Quluzadə Həmid, Rəhimli Sonaxanım və Elməddin Məmmədov yer alır. Komandaya iki nəfər də xaricdən texniki dəstək göstərir. Onların birlikdə ortaya qoyduğu bu iş, Azərbaycanın oyun sektorunda nələrin mümkün ola biləcəyini nümayiş etdirməkdədir.
Emil Nağızadə
18:39 05.04.2025
Oxunuş sayı: 2814
