TAP ilə hidrogen və bərpa olunan qazların nəqli üçün yol xəritəsi hazırlanıb
Trans-Adriatik Qaz Boru Kəməri Konsorsiumu (TAP AG) təbii qazın hidrogenlə qarışığının, eləcə də digər bərpa olunan qazların orta və uzunmüddətli dövrdə nəqli üçün yol xəritəsi hazırlayıb.
Crossmedia.az xəbər verir ki, bu barədə TAP AG-nin idarəedici direktoru Luka Skiepatti Bakıda keçirilən Cənub Qaz Dəhlizi Məşvərət Şurasının 11-ci və Yaşıl Enerji Məşvərət Şurasının 3-cü iclaslarında çıxışı zamanı bildirib.
L.Skiepatti qeyd edib ki, hazırda Trans-Adriatik Boru Kəmərində istifadə olunan materiallar beynəlxalq laboratoriyalarda sınaqdan keçirilir. Eyni zamanda, TAP infrastrukturunun hidrogenin nəqli üçün texniki uyğunluğu təhlil olunur. Bu proses “uyğunsuzluqların təhlili” (gap analysis) çərçivəsində aparılır və nəticələr gələcək planlaşdırmada nəzərə alınacaq.
O əlavə edib ki, TAP konsorsiumu biometanın istifadəsi imkanlarına da xüsusi diqqət yetirir:
“Xüsusilə, Yunanıstandan başlayaraq Avropa İttifaqı səviyyəsində normativ bazanın inkişafına dəstək göstərilir. Bu çərçivədə milli reyestrin, mənşə sertifikatları sisteminin yaradılması və biometanın dayanıqlılığının təsdiqlənməsi nəzərdə tutulur”.
L.Skiepatti bildirib ki, belə bir sistem biometanın Avropada virtual olaraq alınmasına və daha sonra TAP kompressor stansiyasına revers rejimində tədarük edilməsinə imkan yaradacaq:
“Orada biometan turbinlər üçün bərpa olunan yanacaq kimi istifadə oluna bilər. Bu isə təbii qazın istifadəsindən yaranan istixana qazı emissiyalarını tamamilə aradan qaldırmağa şərait yaradacaq”.
Qeyd edək ki, Azərbaycan qazının Avropaya tədarükü 2020-ci ilin sonunda Cənub Qaz Dəhlizinin əsas hissəsi olan Trans-Adriatik Boru Kəməri vasitəsilə başlayıb.
TAP-ın ümumi uzunluğu 878 km-dir. Bunun 550 km-i Yunanıstanın şimal hissəsindən, 215 km-i Albaniya ərazisindən, 105 km-i Adriatik dənizinin dibi ilə, 8 km-i isə İtaliya ərazisindən keçir.
Azərbaycan və Avropa İttifaqı arasında əldə olunmuş razılaşmaya əsasən, 2027-ci ilə qədər Azərbaycan qazının Avropaya tədarük həcmi ildə minimum 20 milyard kubmetrə çatmalıdır. TAP-ın genişləndirilməsinin birinci mərhələsi çərçivəsində İtaliya 1 milyard kubmetr, Albaniya isə 200 milyon kubmetr Azərbaycan qazı alacaq.
20:24 04.04.2025
Oxunuş sayı: 8148
