Azərbaycan Cənubi Qafqazın açar dövlətidir - bu həqiqəti Rusiya da anlayır
Azərbaycanlan Rusiya arasında diplomatik münasibətlərin qurulmasının 33 ili tamam olur. Bu münasibətlə Azərbaycanın xarici işlər naziri Ceyhun Bayramov və Rusiyanın xarici işlər naziri Sergey Lavrov arasında təbrik məktublarının mübadiləsi baş tutub.
Bu barədə Azərbaycan Xarici İşlər Nazirliyi məlumat yayıb.
Ceyhun Bayramov məktubda bildirib ki, ötən onilliklər ərzində iki arasında ümumi tarixi dəyərlərə, qarşılıqlı hörmətə və etimada əsaslanan, o cümlədən bir-birinin maraqlarını nəzərə alan ikitərəfli münasibətlər uğurla inkişaf edərək strateji tərəfdaşlıqdan müttəfiqlik münasibətlərinə çevrilib:
"Təbii ki, ən yüksək səviyyədə müntəzəm siyasi dialoq əməkdaşlığın mütərəqqi inkişafında mühüm amil olmaqla hər zaman Azərbaycan-Rusiya qarşılıqlı fəaliyyətinə rəvac verib. 2022-ci il fevralın 22-də Müttəfiqlik qarşılıqlı fəaliyyəti haqqında Bəyannamənin imzalanması dövlətlərarası münasibətlərin keyfiyyətcə yeni səviyyəyə keçidini təmin edərək, müxtəlif sahələrdə uzunmüddətli əməkdaşlıq üçün möhkəm zəmin yaradıb".
XİN başçısı vurğulayıb ki, bu gün intensiv ikitərəfli təmaslarla səciyyələnən müttəfiqlik çərçivəsində qarşılıqlı fəaliyyət səmərəli şəkildə möhkəmlənməkdə davam edir:
"Bunun bariz nümunəsi ticarət dövriyyəsinin durmadan artması, qanunvericilik bazasının genişləndirilməsi, eləcə də birgə layihə və təşəbbüslərin uğurla həyata keçirilməsidir. İkitərəfli gündəmdə mədəni-humanitar əlaqələrin və regionlararası əməkdaşlığın genişləndirilməsi məsələləri xüsusi yer tutur. Şübhəsiz ki, xarici siyasət qurumları arasında sıx əməkdaşlıq qarşılıqlı maraq doğuran geniş spektrli məsələlər üzrə müttəfiqlik qarşılıqlı fəaliyyətin möhkəmlənməsinə kömək edir".
Nazir əlavə edib ki, Azərbaycan-Rusiya münasibətləri hər iki dövlətin və xalqların mənafelərinə uyğun olaraq bundan sonra da hərtərəfli şəkildə dərinləşəcək və yeni məzmunla təmin olunacaq.
Məktub mübadləsinin ikitərəfli əlaqələrin perspektivinə təsiri barədə Crossmedia.az-a danışan Milli Məclisin deputatı Hikmət Babaoğlunun sözlərinə görə, xarici siyasətin özünəməxsus çağırışları var: "Ona görə də xarici siyasət heç vaxt başqa dövlətlərə münasibətdə tək xətt üzrə irəliləmir. Amma əsas odur ki, strateji məqsədlər pozulmasın. Düşünürəm ki, Rusiya Azərbaycan üçün ona görə əhəmiyyətlidir ki, hazırda həm Cənubi Qafqaz regionunda, həm Yaxın Şərqdə, həm də bütövlükdə Şərqi Avropada və dünyada yeni bir güc balansı, yeni nizam formalaşmaqdadır. İki qonşu ölkənin öz maraqlarını uzlaşdırması və yeni dünya nizamında ortaq mövqedən çıxış etməsi üçün şərtlər yaranır".
Müsahibimiz bildirib ki, indiki vəziyyətdə Rusiyanın Azərbaycana maraq göstərməsi və bunu mühüm əhəmiyyət kimi qiymətləndirməsi həm rəsmi Bakının yaratdığı yeni reallıqlarla, həm də onun beynəlxalq münasibətlər sistemindəki rolu ilə bağlıdır: "Yeni reallıqdan sonra Cənubi Qafqazda Azərbaycan açar ölkə statusundadır. Yəni Azərbaycanla əməkdaşlıq etmədən Cənubi Qafqazda hər hansı bir addım atmaq və ya hər hansı bir mənafedən çıxış etmək mümkün deyil. Düşünürəm ki, bəzən Azərbaycanın bu mövqeyi Rusiyadakı dairələr tərəfindən qısqanılsa və həzm edilməsə də, rasional düşüncə tələb edir ki, Azərbaycanla münasibətlər mütləq yüksək səviyyədə saxlanmalıdır. Çünki region məsələsi artıq Azərbaycanın əlindədir. Rusiyanın bu şəkildə diplomatik formada özünü ifadə etməsi də bu həqiqətin dərk edilməsi deməkdir".
Aydan Quliyeva
17:23 04.04.2025
Oxunuş sayı: 10478
