Vətəndaşlarını evini başına yıxan şirkət sahibini hansı cəza gözləyir? -Hüquqşünas açıqladı
"Melissa Group" şirkətinin rəhbəri Qalib Məmmədovun saxlanılması, ölkə daxilində geniş müzakirələrə səbəb olub. Yasamal rayonunda baş verən söküntü işi ilə əlaqədar cinayət işi çərçivəsində keçirilən əməliyyat nəticəsində şirkət rəhbərinin tutulması, xüsusilə sosial şəbəkələrdə böyük əks-səda doğurub. İnsanları dəhşətə gətirən bir video, Bakı şəhərindəki bir tikinti sahəsində baş verən qanunsuzluqları gözlər önünə sərib. Tikinti işləri zamanı istifadə olunan böyük ekskavatorun, içində insanlar olan bir evin pəncərəsini və divarını dağıdaraq sakinləri vahiməyə salması, bir çox insanı təəccübləndirib. Bu hadisə, "Melissa Park" layihəsinin ətrafında gedən mübahisələri daha da qızışdırıb və məsələnin hüquqi, etik və sosial tərəfləri ilə bağlı suallar yaratmağa səbəb olub. Sözügedən hadisənin hüquqi tərəfləri və Q.Məmmədovu gözləyən müvafiq cəza ilə bağlı hüquqşünas Əlövsət Allahverdiyev Crossmedia.az-a açıqlama verib: "Bu gün mülkiyyət hüququnun qorunması olduqca aktual məsələlərdən biridir. Təəssüf ki, müasir dövrdə mülkiyyət hüququnun qorunması ilə bağlı bəzi boşluqlar müşahidə olunur və bəzən bundan sui-istifadə edilir".
Ə.Allehverdiyev söyləyib ki, beynəlxalq səviyyədə mülkiyyət hüququna vahid və universal yanaşma olmasa da, o, vətəndaşın ayrılmaz hüququ olaraq Ümumdünya İnsan Hüquqları Bəyannaməsinin 17-ci maddəsində öz əksini tapmışdır: "Bu maddədə göstərilir ki, hər bir insan təkbaşına və ya başqaları ilə birlikdə əmlaka sahib olmaq hüququna malikdir və heç kəs öz əmlakından özbaşına məhrum edilməməlidir. Mülkiyyət hüququ bütün dünyada əsas insan hüquqlarının tərkib hissəsi olmaqla yanaşı, bizim ölkəmizdə də qanunla müəyyən edilmiş qaydada qorunur və Azərbaycan Respublikası Konstitusiyasının 29-cu maddəsi ilə tənzimlənir. Konstitusiya, həm də bu hüquqların həyata keçirilməsini təmin etdiyi üçün yalnız hüquqi dəyər daşımır, həm də tərbiyəvi əhəmiyyətə malikdir və vətəndaşlar arasında qanunun aliliyinin qorunmasına və hörmət edilməsinə kömək edir".
Hüquqşünas əlavə edib ki, Azərbaycan Respublikası Mülki Məcəlləsinin 152.1-ci maddəsinə əsasən, mülkiyyət hüququ subyektin ona mənsub əmlaka öz istədiyi kimi sahib olmaq, ondan istifadə etmək və ona dair sərəncam vermək üzrə dövlət tərəfindən tanınan və qorunan hüququdur: "İddia olunur ki, mülkiyyət hüququ vətəndaşın ayrılmaz hüququ olduğu üçün ona mütləq hörmət olunmalıdır. Bu səbəbdən də qanunvericilik mülkiyyətçiyə, onun səlahiyyətlərini həyata keçirməyə problem yaradan bütün maneələri aşmağa imkan verir. Lakin bəzən vətəndaşlar qanunvericiliyin onlara verdiyi hüquqlardan istifadə edə bilmirlər. Bu, daha çox məlumatsızlıqdan qaynaqlanır. Bundan istifadə edən və məsuliyyətlərini unudan səlahiyyətli şəxslər vətəndaşların mülkiyyət hüququnu pozur, onları mülkiyyətindən məhrum edir və ya zorla əlindən alır. Bu, həm milli qanunvericiliyin, həm də beynəlxalq hüquq normalarının tələblərinin pozulmasıdır. Vətəndaşların mülkiyyət hüququna qəsd edən şəxslər bilməlidirlər ki, bu, birbaşa hüquq pozuntusudur və cinayət qanunvericiliyinə əsasən məsuliyyət yaradır. Bununla bağlı Azərbaycan Respublikası Cinayət Məcəlləsinin 186-cı maddəsinin konkret tələbləri mövcuddur. Həmin maddənin 186.1-ci bəndində göstərilir ki, özgənin əmlakını qəsdən məhv etmə və ya zədələmə, zərərçəkmiş şəxsə xeyli miqdarda ziyan vurmaqla törədildikdə, cinayət nəticəsində vurulmuş ziyanın iki mislindən üç mislinədək miqdarda cərimə və ya iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır. 186.2. maddəyə görə eyni əməllər: 186.2.1. Zərərçəkmiş şəxsə külli miqdarda ziyan vurmaqla törədildikdə; 186.2.2. Yandırmaqla, partlatmaqla və ya başqa ümumi təhlükəli üsulla törədildikdə və ya ağır nəticələrə səbəb olduqda- üç ildən yeddi ilədək müddətə azadlıqdan məhrum etmə ilə cəzalandırılır. Bu Məcəllənin 186.1 və 186.2-ci maddələrində nəzərdə tutulmuş əməllər xüsusilə külli miqdarda ziyan vurmaqla törədildikdə — yeddi ildən on ilədək müddətə azadlıqdan məhrum etmə ilə cəzalandırılır".
Hüquqşünas hesab edir ki, qanunvericiliyin bu tələbləri ilə hər kəs tanış olmalı və onları pozmamağa çalışmalıdır.
Xumar Emilqızı
16:50 28.03.2025
Oxunuş sayı: 1453
