KİV: Putin Qərbə qarşı hibrid müharibəsini genişləndirir
ABŞ Prezidenti Donald Tramp onu öz tərəfinə çəkməyə çalışarkən, Kreml Qərbə qarşı sabotaj kampaniyasını gücləndirir.
Crossmedia.az xəbər verir ki, bu barədə xarici KİV yazıb.
Qeyd olunub ki, yanvarın sonlarında Trampın ikinci prezidentlik müddətinə başlamasından cəmi bir həftə sonra, NATO-nun yüksək vəzifəli rəsmisi Avropa Parlamentində çıxış edərək, Rusiyanın hibrid müharibə taktikalarından getdikcə daha aqressiv istifadə etdiyini və bunun Qərb üçün ciddi təhlükə yaratdığını bildirib. NATO-nun innovasiya, hibrid və kiber təhlükəsizlik üzrə baş katibinin müavini Ceyms Appaturai son iki ildə NATO ölkələrində baş vermiş sabotaj hadisələrindən danışıb. O, dəmir yolu qəzaları, yanğınlar, kritik infrastruktur obyektlərinə hücumlar və hətta iri sənayeçilərə qarşı sui-qəsd planları da daxil olmaqla, bir sıra təxribat aktlarının qeydə alındığını vurğulayıb.
Appaturai bildirib ki, Rusiya Prezidenti Vladimir Putin 2022-ci ildə Ukraynaya qarşı genişmiqyaslı müharibəyə başlayandan bəri Rusiya xüsusi xidmət orqanları tərəfindən həyata keçirilən sabotaj əməliyyatları 15 ölkədə qeydə alınıb. Yanvar ayında keçirilən dinləmədən sonra jurnalistlərə açıqlama verən NATO rəsmisi bu hücumların miqyasının artdığını və alyansın artıq müharibə rejiminə keçməli olduğunu bildirib. Lakin o vaxtdan bəri, Trampın Putinə yönəlmiş dramatik jestləri bu sabotaj kampaniyasını ikinci plana atıb. ABŞ administrasiyası Ukraynadakı müharibəni tez bir zamanda bitirmək üçün Rusiya ilə yeni razılaşma əldə etməyə çalışdığını bəyan edib və Moskva ilə münasibətlərdə yeni mərhələyə qədəm qoyulduğunu iddia edib. Ağ Ev eyni zamanda Federal Təhqiqat Bürosu və Daxili Təhlükəsizlik Departamenti daxilində kiber müharibə, dezinformasiya və seçki müdaxiləsinə qarşı mübarizəni zəiflədən addımlar atıb – halbuki bütün bu təhdidlər daha öncə Moskva ilə əlaqələndirilmişdi.
Tramp Rusiyaya etibar edilə biləcəyini və Putinin gözlənildiyindən daha səxavətli davranacağını söyləyib. Lakin Kremlin casuslarının və diversantlarının geri çəkiləcəyi ilə bağlı fərziyyə böyük səhv olardı. Çünki onların siyasi rəhbərləri bunu qəbul etməzdi. Moskvanın təhlükəsizlik aparatında çox az adam ABŞ və Qərblə dayanıqlı sülhün mümkün olduğuna inanır. Fevral ayında Kremlə yaxın olan Valday Klubunun tədqiqat rəhbəri Fyodor Lukyanov bildirib ki, “İkinci Yalta” – yəni Avropanın sərhədlərini və təsir dairələrini yenidən müəyyən edən qlobal razılaşma – mümkün deyil. Kremlin xarici siyasət ideoloqlarından biri olan Dmitri Suslov isə ABŞ-Rusiya münasibətlərində istənilən yumşalmanın 2026-cı ildə keçiriləcək ABŞ aralıq seçkilərinə qədər davam etməyəcəyini vurğulayıb.
Eyni zamanda, Rusiya xüsusi xidmət orqanlarında ABŞ-nin niyyətlərinə qarşı dərin etimadsızlıq mövcuddur. Rusiyada yüzillər boyu Qərb Rusiyanı ya ram etməyə, ya da məhv etməyə çalışırmış kimi qəbul edilib. Sovet və Rusiya kəşfiyyat orqanları isə uzun onilliklərdir ki, Qərbi amansız düşmən hesab ediblər. Trampın Putinə yönəlmiş siyasəti, Moskvanın casusları üçün Avropada subversiya kampaniyasını genişləndirmək üçün bir fürsət yaradıb. Ağ Evin NATO-ya və onun transatlantik müttəfiqlərinin müdafiəsinə skeptik yanaşması Kremlin Avropada qeyri-konvensional hücumlar həyata keçirmək istəyini daha da artıra bilər.
Xumar Emilqızı
22:30 25.03.2025
Oxunuş sayı: 6510
