Fransada yetkinlik yaşına çatmayan cinayətkarlar üçün daha sərt cəzalar gündəmdədir
Fransa Senatı keçmiş baş nazir Qabriel Attalın gənclər arasında cinayətkarlıqla mübarizə aparacağını iddia etdiyi mübahisəli qanun layihəsini nəzərdən keçirməyə hazırlaşır.
Crossmedia.az xarici mediaya əsasən bildirir ki, Milli Məclisdə birinci oxunuşda yaşıl işıq yandırılan qanun layihəsində övladlarına qarşı qanuni öhdəliklərini yerinə yetirməyən valideynlər üçün daha sərt sanksiyalar təklif edilir, eyni zamanda yetkinlik yaşına çatmayan cinayətkarların dəfələrlə məhkəmə məsuliyyətinə cəlb edilməsinə dair prosedurlar sürətləndirilir.
2024-cü ilin yanvar-sentyabr aylarında Fransanın baş naziri vəzifəsini icra edən Attal qanun layihəsinin hazırlanmasına 2023-cü ilin yayında ölkə daxilində baş verən üsyanların səbəb olduğunu bildirib. Həmin dövrdə bəziləri 12 və ya 13 yaşında olan yüzlərlə uşaq 17 yaşlı Nahel M.-in polis tərəfindən öldürülməsinə etiraz edərək küçələrə çıxmışdı.
Hazırda Fransada valideynlər “azyaşlı övladının sağlamlığına, təhlükəsizliyinə, əxlaqına və ya təhsilinə” təhlükə törətdiklərinə görə iki ilə qədər həbs və 30 000 avro cərimə ilə üzləşsələr də, yeni qanun cəzaların üç ilə, cərimələrin isə 45 000 avroya qədər artırılmasını tələb edir. Hakimlər valideynləri ictimai işlərə də məhkum edə bilər.
Qanun layihəsində həmçinin Fransanın yetkinlik yaşına çatmayanlara qarşı ədalət mühakiməsi qanununa dəyişikliklər nəzərdə tutulur ki, bu da 16 yaşdan yuxarı cinayətkarların tez bir zamanda mühakimə olunmasını tələb edir.
Lakin qanun layihəsi sərt tənqidlərlə üzləşib. Noyabr ayında hökumətin müstəqil inzibati orqanı olan Fransa Hüquq Müdafiəçisi (Défenseur des Droits) xəbərdarlıq edib ki, qanun layihəsi Fransanın bir sıra beynəlxalq öhdəliklərini, xüsusən də Uşaq Hüquqları üzrə Beynəlxalq Konvensiyanı poza bilər.
Zəhra Ağayeva
20:36 25.03.2025
Oxunuş sayı: 752
