NATO Aralıq dənizində hərbi təlimlərə başlayıb
NATO 2025-ci il üçün planlaşdırılan ən böyük dəniz təlimlərindən biri olan "Dynamic Mariner/Flotex 25"ə start verib. İspaniya Müdafiə Nazirliyinin məlumatına görə, martın 25-də başlayan və aprelin 4-dək davam edəcək təlimlərə 9 NATO ölkəsindən təxminən 4000 hərbçi, 30 döyüş gəmisi, iki sualtı qayıq və bir neçə hava vasitəsi cəlb olunub.
Crossmedia.az xarici mənbəyə istinadən xəbər verir ki, təlimlər İspaniyanın ərazi suları, Aralıq dənizinin qərb hissəsi və Atlantik okeanında keçirilir. Fransa, Almaniya, İtaliya, Portuqaliya, İspaniya, Xorvatiya, ABŞ, Yunanıstan və Türkiyənin iştirak etdiyi manevrlər çərçivəsində müxtəlif döyüş ssenariləri, o cümlədən dəniz komandanlığı və idarəetmə, amfibiya əməliyyatları, sualtı qayıqlara qarşı mübarizə və kibermüdafiə imkanları sınaqdan keçiriləcək.
NATO-nun Müttəfiq Dəniz Komandanlığının (MARCOM) məlumatına görə, genişmiqyaslı hərbi təlim ittifaqın dəyişən təhlükəsizlik şəraitində strateji dəniz yollarını qorumaq bacarığını sınaqdan keçirmək məqsədi daşıyır.
Bundan əlavə, NATO-nun Müttəfiq Reaksiya Qüvvələrinin nümayəndələri adi, hibrid və kiber təhdidlərə qarşı sürətli və effektiv cavab vermək qabiliyyətinin artırılması üçün bu cür təlimlərin xüsusi əhəmiyyət kəsb etdiyini vurğulayıblar.
20:29 25.03.2025
Oxunuş sayı: 6249
