Abbas Əraqçı: İran hələ ki, Trampın məktubuna cavab verməyib
İranın xarici işlər naziri Abbas Əraqçı İrəvanda Ermənistanın xarici işlər naziri Ararat Mirzoyanla birgə keçirdiyi mətbuat konfransında mühüm açıqlamalar verib. Crossmedia.az bildirir ki,o qeyd edib ki, İran hələ ABŞ-nin prezidenti Donald Trampın məktubuna cavab verməyib və hazırda cavab hazırlıq mərhələsindədir.
Həmçinin Əraqçı İranın ABŞ ilə danışıqlara dair mövqeyinin dəyişmədiyini vurğulayıb:
“Biz təzyiq, hərbi təhdidlər və iqtisadi sanksiyalar fonunda ABŞ ilə birbaşa danışıqlara getməyəcəyik”.
Abbas Əraqçı İranın nüvə proqramına dair danışıqlara açıq olduğunu və daha çox şəffaflıq təmin etmək üçün həmişə bu mövzuda dialoqa hazır olduqlarını bildirib.
Bölgədəki siyasi vəziyyətə toxunan İran rəsmisi Tehran rəhbərliyinin Ermənistan və Azərbaycan arasında sülh razılaşmasını alqışladığını və hər iki ölkəni bu sənədi mümkün qədər tez imzalamağa çağırdığını qeyd edib.
“Biz region ölkələrinin müstəqilliyini və ərazi bütövlüyünü dəstəkləyirik. Beynəlxalq sərhədlərdə istənilən dəyişikliyə qarşıyıq və bu, İran İslam Respublikasının dəyişməz mövqeyidir.”
Əraqçı bölgədəki problemlərin hərbi güc tətbiq edilmədən, diplomatiya və dialoq yolu ilə həll edilməsinin vacibliyini vurğulayıb. O, həmçinin regionda kommunikasiyaların ölkələrin suverenliyi, ərazi bütövlüyü və milli qanunvericilik çərçivəsində açıq olması prinsipinə sadiq qaldıqlarını bildirib.
Fidan Xəlilova
18:45 25.03.2025
Oxunuş sayı: 8075
