Xarici xəbərlər

Xamneyi ABŞ-nin danışıqlara çağırışını "dünya ictimai rəyinin aldadılması" adlandırdı

İranın ali lideri Ayətullah Əli Xamenei ABŞ-nin Tehrana danışıqlara başlamaq çağırışını tənqid edərək bunun dünya ictimaiyyətini aldatmaq məqsədi daşıdığını bildirib.

O vurğulayıb ki, İranın ABŞ-lə aparılan danışıqlardan heç bir fayda görmədiyini və bu cür təkliflərin yalnız sanksiyaların sərtləşdirilməsinə səbəb olacağını düşünür.

Crossmedia.az xəbər verir ki, Xamenei helikopter qəzasında həlak olan keçmiş prezident İbrahim Rəisi və regiondakı digər siyasi-hərbi liderlərin itkisindən danışıb. "Onların yoxluğu böyük itkidir, lakin İran bu gün əvvəlkindən daha zəif deyil", – deyə o vurğulayıb.

Xatırladaq ki, ABŞ prezidenti Donald Tramp administrasiyası İranla yeni danışıqlara hazır olduğunu bildirmişdi. Lakin İran rəhbərliyi bu cür çağırışların səmimi olmadığını və Vaşinqtonun keçmişdə imzalanmış müqavilələri pozduğunu əsas gətirərək danışıqlardan imtina edib.

Qeyd edək ki, Xamenei İranın nüvə siyasəti barədə də açıqlama verib. O bildirib ki, "Əgər İran nüvə silahı əldə etmək istəsəydi, ABŞ buna mane ola bilməzdi. Lakin nüvə silahına sahib olmamaq ölkənin öz seçimidir".

Bununla yanaşı, o, ABŞ-nin İranı hərbi müdaxilə ilə hədələməsini "ağılsızlıq" adlandıraraq qeyd edib ki, "İran istənilən hücuma cavab vermək gücünə malikdir və əgər belə bir addım atılarsa, ABŞ bundan ən çox zərər görən tərəf olacaq".

🖨 Çap et

23:15 12.03.2025

Oxunuş sayı: 490