Pakistanda qatar girov böhranı başa çatdı – 300-dən çox sərnişin xilas edildi
Pakistanda Bəlucistan Azadlıq Ordusu (BLA) tərəfindən qatarda girov götürülən 300-dən çox sərnişin təhlükəsizlik qüvvələrinin keçirdiyi əməliyyat nəticəsində azad edilib. Hadisə zamanı 25 nəfər həyatını itirib, 33 hücumçu isə zərərsizləşdirilib.
Crossmedia.az xəbər verir ki, hadisə Pakistanın Bəlucistan əyalətinin Bolan rayonunda baş verib. Separatçı BLA üzvləri sərnişin qatarına hücum edərək onlarla insanı girov götürüblər. Pakistan ordusu əməliyyatın uğurla başa çatdığını və ölənlərdən 21-nin mülki şəxs, 4-nün isə hərbçi olduğunu açıqlayıb.
Xatırladaq ki, Bəlucistan Azadlıq Ordusu Pakistanda uzun müddətdir separatçı fəaliyyətlər həyata keçirir və tez-tez təhlükəsizlik qüvvələri ilə toqquşmalara girir. Bu hücum da təşkilatın son illərdə törətdiyi ən iri miqyaslı terror aktlarından biri olub.
Qeyd edək ki, Pakistan hökuməti BLA-nı terror təşkilatı kimi tanıyır və bu cür hücumların qarşısını almaq üçün regionda hərbi əməliyyatları davam etdirir. Ölkənin təhlükəsizlik strukturları Bəlucistan əyalətində sabitliyi bərpa etmək məqsədilə tədbirləri gücləndirib.
22:58 12.03.2025
Oxunuş sayı: 562
