Giya Volski: “Müxalifətin seçkilərdə iştirakı qərar deyil, təlimatdır”
Gürcüstan parlamentinin birinci vitse-spikeri Giya Volski müxalifətin yerli özünüidarəetmə orqanlarına seçkilərdə iştirak edib-etməməsi ilə bağlı açıqlama verib. Onun sözlərinə görə, bu, müxalifətin verdiyi qərar deyil, onlar üçün müəyyən edilmiş təlimatdır.
Crossmedia.az xarici mediaya istinadən xəbər verir ki, Volski beynəlxalq vəziyyətin gərgin olduğunu vurğulayaraq, dünyada davam edən qarşıdurmanın təhlükəli nəticələrə səbəb ola biləcəyini bildirib. O, Avropa liderlərini və ABŞ-nin yeni administrasiyasını məsələyə müdaxilə etməyə çağırıb.
"Dövlət yenidən qüvvələrini və maliyyə resurslarını səfərbər edib. Gürcüstan isə bu qarşıdurmanın kiçik seqmentlərindən biridir. Burada vəziyyəti gərginləşdirmək üçün qlobal müharibə partiyasının əmrlərini yerinə yetirən qüvvələr fəaliyyət göstərir", – deyə Volski bildirib.
Onun sözlərinə görə, ölkədə iqtisadi çöküş məqsədli şəkildə yaradılır və bu, bəzi qüvvələrin hakimiyyətə gəlməsi üçün bir vasitə kimi istifadə olunur.
“Siyasi diaqnoz artıq qoyulub – əgər bu qüvvələr siyasi arenaya, xüsusən də yerli özünüidarəetmə seçkilərinə qatılmasalar, kənarda qalacaqlar. Bəziləri artıq bu təlimata qarşı narazılıq ifadə edirlər, lakin onların yekun mövqeyi hələ müəyyənləşməyib", – deyə vitse-spiker qeyd edib.
O, müxalifət daxilində narazılıqların artdığını və bunun siyasi proseslərə təsir edə biləcəyini də vurğulayıb.
Zeynəb Yunuszadə
22:18 12.03.2025
Oxunuş sayı: 634
