Xameneyi: "ABŞ-nin İranla danışıqlara çağırışı ictimai rəyi çaşdırmaq məqsədi daşıyır"
İranın ali rəhbəri Ayətullah Əli Xameneyi ABŞ prezidenti Donald Trampın İranla danışıqlara hazır olması barədə bəyanatına sərt reaksiya verib. O, Vaşinqtonun bu açıqlamalarının ictimaiyyəti çaşdırmaq məqsədi daşıdığını bildirib.
Crossmedia.az xarici KİV-ə istinadən xəbər verir ki, Xameneyi ABŞ prezidentinin İranla danışıqlara dair çağırışını və ona məktub göndərməsini şərh edərək qeyd edib ki, Vaşinqton bu cür addımlarla dünyaya danışıqlara hazır olduqları, lakin İranın buna razılıq vermədiyi mesajını verməyə çalışır.
"Neçə il oturub danışdıq, lakin həmin şəxs imzalanmış razılaşmaları masanın üzərindən cırıb atdı. ABŞ öz öhdəliklərini yerinə yetirmədiyi halda, nədən danışmaq olar?" – deyə İran lideri bildirib.
Xatırladaq ki, İran və ABŞ arasındakı gərginlik 2018-ci ildə Tramp administrasiyasının İranla imzalanmış Nüvə Razılaşmasından çıxması ilə daha da artmışdı. Vaşinqton İrana qarşı sanksiyaları gücləndirərək, Tehranı yeni şərtlərlə razılaşmağa vadar etməyə çalışırdı.
Qeyd edək ki, İran tərəfi ABŞ-la yeni danışıqlara getməyin mənasız olduğunu bildirir və rəsmi Tehran Vaşinqtonun siyasətində ciddi dəyişikliklər olmadığı müddətcə hər hansı bir razılaşmaya etibar etməyəcəyini vurğulayır.
21:30 12.03.2025
Oxunuş sayı: 492
