Tramp: "Ukraynada atəşkəs Rusiyanın öhdəsindədir"
ABŞ prezidenti Donald Tramp Ukrayna ilə 30 günlük müvəqqəti atəşkəs barədə razılığa gəldiklərini və bunun tam atəşkəsə çevrilməsi üçün Rusiyanın qərarını gözlədiklərini bildirib.
Crossmedia.az xarici mediaya istinadən xəbər verir ki, o, danışıqların uğurlu keçdiyini vurğulayaraq, bəzi Amerika rəsmilərinin Moskva ilə müzakirələr aparmaq üçün yola düşdüyünü açıqlayıb.
Tramp Ağ Evdə İrlandiyanın Baş naziri Micheal Martin ilə görüşü zamanı Rusiya-Ukrayna münaqişəsi ilə bağlı jurnalistlərin suallarını cavablandırıb. O, Səudiyyə Ərəbistanının Ciddə şəhərində ABŞ və Ukrayna nümayəndə heyətləri arasında müvəqqəti atəşkəs barədə razılıq əldə edildiyini bildirib.
"Ukrayna bu razılaşmanı qəbul etdi və ümid edirəm ki, Rusiya da bunu qəbul edəcək. Biz bu gün və sabah onlarla görüşəcəyik və razılığa gəlməyə çalışacağıq. Əgər bu baş verərsə, tam atəşkəs əldə edəcəyik," – deyə Tramp vurğulayıb.
Trampın sözlərinə görə, Rusiya ilə aparılacaq danışıqlar uğurlu olarsa, bu münaqişəni dayandırmaq üçün böyük addım atılmış olacaq. O, həftə ərzində Rusiya prezidenti Vladimir Putinlə də görüşəcəyini təsdiqləyib və prosesi "tanqoya iki lazımdır" ifadəsi ilə şərh edib.
Xatırladaq ki, Rusiya-Ukrayna müharibəsi 2022-ci ilin fevralından davam edir və Qərbin vasitəçilik səylərinə baxmayaraq, tərəflər arasında uzunmüddətli sülh razılaşması əldə olunmayıb. ABŞ və Avropa İttifaqı Ukraynanı dəstəkləyən əsas güclərdən biri olsa da, Rusiya ilə danışıqların nəticəsiz qalması müharibənin uzanmasına səbəb olub.
Qeyd edək ki, Tramp açıqlamasında Avropa İttifaqını da tənqid edərək, AB-nin uzun illər ABŞ-a qarşı ədalətsiz ticarət siyasəti yürütdüyünü və bundan faydalandığını iddia edib. O, ABŞ-ın Aİ-yə qarşı gömrük tariflərini sərtləşdirəcəyini bildirib. “Avropa Birliyi ABŞ-dan faydalanmaq üçün yaradılıb”, – deyə Tramp vurğulayıb.
21:05 12.03.2025
Oxunuş sayı: 5829
