Ərdoğandan Aİ-yə çağırış: “Buna ancaq Türkiyə ilə nail ola bilərlər”
Türkiyə Prezidenti Rəcəb Tayyib Ərdoğan Polşanın Baş naziri Donald Tusk ilə birgə mətbuat konfransında Avropa İttifaqı (Aİ) ilə münasibətlər, təhlükəsizlik məsələləri və iqtisadi əməkdaşlıq barədə vacib açıqlamalar verib.
O, Türkiyənin Aİ-yə tamhüquqlu üzvlüyünün strateji hədəf olduğunu vurğulayaraq, Avropa Birliyinin güc və nüfuz itkisini yalnız Türkiyənin üzvlüyü ilə bərpa edə biləcəyini bildirib.
Crossmedia.az Haberglobal-a istinadən xəbər verir ki, prezident Ərdoğan bildirib ki, Polşa ilə Türkiyə arasındakı münasibətlər strateji tərəfdaşlıq səviyyəsindədir. O, ticarət həcminin 15 milyard dollara çatdırılması hədəfinin müəyyən edildiyini və iki ölkə arasında iqtisadi əlaqələrin genişləndirilməsinin vacibliyini qeyd edib. Bununla yanaşı, Ərdoğan və Tusk regional təhlükəsizlik məsələləri, xüsusilə də Rusiya-Ukrayna müharibəsi və onun nəticələri barədə fikir mübadiləsi aparıblar. Türkiyə Prezidenti Ukraynanın atəşkəs qəbul etməsini müsbət addım kimi qiymətləndirib və Rusiyanı da konstruktiv mövqe sərgiləməyə çağırıb.
Xatırladaq ki, Türkiyə 1963-cü ildən etibarən Aİ ilə əlaqələrini inkişaf etdirməyə çalışır və 1999-cu ildə rəsmi namizəd statusu alıb. Lakin üzvlük danışıqları müxtəlif səbəblərdən ləngiyib. Son illərdə Aİ və Ankara arasında münasibətlər viza problemləri, gömrük birliyi məsələləri və insan haqları ilə bağlı mübahisələr səbəbindən dalğalanmalar yaşayıb.
Qeyd edək ki, Türkiyə NATO çərçivəsində Avropanın təhlükəsizliyində mühüm rol oynayır və alyansın şərq və cənub cinahlarında yerləşən əsas müttəfiqlərdən biridir. Ərdoğan Polşanın Aİ Şurasına sədrliyi çərçivəsində Türkiyənin üzvlük prosesinə dəstəyini artıracağına ümid etdiyini bildirib. O, Aİ ilə əməkdaşlığın qarşılıqlı fayda və hörmət prinsipləri əsasında inkişaf etdirilməsinin vacibliyini vurğulayıb.
20:43 12.03.2025
Oxunuş sayı: 474
