Suriya Demokratik Güclərinin minlərlə döyüşçüsü hökumət ordusuna qoşulacaq
Suriya Demokratik Gücləri (SDG) ilə Dəməşqdəki rəsmi hökumət arasında imzalanan razılaşmaya əsasən, təxminən 7,5 min döyüşçü Suriya ordusunun sıralarına qoşulacaq.
Crossmedia.az xəbər verir ki, bu barədə Türkiyənin Türkiye qəzeti İstiqlalçı Suriya Kürdləri İttifaqının rəhbəri Əbdüləziz Temoya istinadən məlumat yayıb.
Onun sözlərinə görə, bu rəqəm yalnız ilkin mərhələdə orduda xidmət edəcək SDG üzvlərini əhatə edir. SDG sıralarında olan qeyri-suriya vətəndaşları isə ölkəni tərk etməli olacaqlar.
Temo əlavə edib ki, SDG-nin təxminən 11 min döyüşçüsü Türkiyədə qadağan olunmuş Kürdüstan Fəhlə Partiyasının (PKK) üzvləridir.
Məlumata görə, PKK Suriya hökuməti ilə əldə olunan razılaşmadan əvvəl də müxtəlif səviyyələrdə, o cümlədən ABŞ-la danışıqlar aparıb. Lakin təşkilatın tələblərinin əksəriyyəti qəbul edilməyib.
Temonun sözlərinə görə, hazırda 11 min PKK üzvü silahsız şəkildə Suriya ərazisini tərk edərək İraqın Qəndil bölgəsinə yollanacaq.
Qeyd edək ki, SDG yaxın zamanda Tişrin su elektrik stansiyasını və Karakozak körpüsünü mərkəzi hakimiyyətə təhvil verməyə hazırlaşır.
Fatimə Məmmədova
16:28 12.03.2025
Oxunuş sayı: 7762
