Azərbaycan və Ermənistan sülh sazişinə yaxınlaşır – Mirzoyan
Azərbaycan və Ermənistan arasında sülh sazişinin hazırlanması prosesi başa çatmaq üzrədir.
Crossmedia.az bildirir ki, bu barədə Ermənistanın xarici işlər naziri Ararat Mirzoyan bildirib.
Onun sözlərinə görə, iki ölkə sülh müqaviləsinin layihəsini tamamlamq üzrədir və əgər sazişin hazırlanması və imzalanması baş tutarsa, bu, Cənubi Qafqazda sabitliyin əsas sütunlarından birinə çevriləcək:
" Ermənistan və Azərbaycan sülh müqaviləsi layihəsinin tamamlanmasına çox yaxındır. Əgər biz, ilk növbədə, onun hazırlanmasını başa çatdırıb imzalaya bilsək, bu, Cənubi Qafqazda uzunmüddətli sülh və sabitliyə töhfə verəcək. Bu, həmçinin iki ölkə arasında artıq əldə olunmuş digər razılaşmaları tamamlayır. Məsələn, bir neçə ay əvvəl sərhədlərin delimitasiyası ilə məşğul olan komissiyaların fəaliyyət qaydalarını təsdiqləyə bildik", – Mirzoyan bildirib.
Nazir həmçinin Ermənistanın Azərbaycana qarşılıqlı silah nəzarəti mexanizmi ilə bağlı təklif verdiyini vurğulayıb.
"Bütün bu vasitələr bölgəmizdə dayanıqlı və uzunmüddətli sülhün qurulmasına kömək edə bilər. Burada müsbət rol oynaya biləcək bütün ölkələr konstruktiv addımları alqışlayır. Digər tərəfdən, qeyd etməliyəm ki, Azərbaycanla əldə etdiyimiz razılaşmalar birbaşa ikitərəfli danışıqlar yolu ilə baş tutub. Ümid edirəm ki, tezliklə məqsədimizə çatacağıq", – Mirzoyan əlavə edib.
Qeyd edək ki, iki ölkə arasında sülh sazişi ilə bağlı danışıqlar bir neçə aydır davam edir və prosesdə həm ikitərəfli görüşlər, həm də beynəlxalq vasitəçilərin iştirakı ilə görüşlər baş tutub.
Fatimə Məmmədova
21:41 11.03.2025
Oxunuş sayı: 11726
