Qazaxıstan Azərbaycanla Ermənistan arasında vasitəçi ola bilər: "İrəvan hazır olmalıdır"
Azərbaycanın xarici işlər naziri Ceyhun Bayramov Qazaxıstana rəsmi səfəri çərçivəsində bu ölkənin Baş nazirinin müavini, xarici işlər naziri Murat Nurtleu ilə görüşüb. Nazirlər arasında baş tutan təkbətək görüş daha sonra hər iki tərəfdən nümayəndə heyətlərinin iştirakı ilə geniş tərkibdə davam edib. Geniştərkibli görüş zamanı iki ölkə arasında mövcud strateji tərəfdaşlıq münasibətləri, ikitərərəfli və çoxtərəfli əməkdaşlığın perspektivləri, habelə regional və beynəlxalq vəziyyət müzakirə olunub.
Tərəflər Azərbaycan-Qazaxıstan strateji tərəfdaşlıq münasibətlərinin səviyyəsindən məmnunluq ifadə edib, iki ölkə arasında baş tutan ali və yüksək səviyyəli təmas və səfərlərin əməkdaşlığın inkişafına xidmət etdiyi vurğulanıb. Həmçinin görüşdə ölkələr arasında siyasi, iqtisadi, ticarət, nəqliyyat, kommunikasiyalar, humanitar və s. istiqamətlər üzrə əməkdaşlıq perspektivləri müzakirə olunub.
İkitərəfli münasibətlərin hazırkı durumu barədə Crossmedia.az-a danışan Milli Məclisin deputatı Ceyhun Məmmədov bildirib ki, səfər türk dövlətləri arasında əlaqələrin inkişafının davamı kimi qiymətləndirilməlidir:
“Türk Dövlətləri Təşkilatı çərçivəsində, eyni zamanda Əməkdaşlıq Təşkilatı və digər strukturlar çərçivəsində də ölkələrimiz arasında əməkdaşlıq əlaqələri daha da inkişaf edir. Bu gün dünyada çox ciddi proseslər gedir və bu proseslərin fonunda bizim əlaqələrimizin inkişafı xüsusi əhəmiyyət daşıyır. Son vaxtlar cənab Prezidentin Orta Asiyaya səfəri baş tutub. Eyni zamanda, Orta Asiya respublikalarının liderləri də Azərbaycanda səfərdə olublar”.
Parlamentari rəsmi Astananın Bakı ilə İrəvan arasında münasibətlərin nornallaşması prosesində vasitəçilik imkanlarına da toxunub: "Bu gün Azərbaycanla Qazaxıstan arasında müxtəlif sahələrdə çox sıx əməkdaşlıq mövcuddur. Bu əməkdaşlıq enerji təhlükəsizliyi sahəsində, iqtisadi sahədə sürətlə inkişaf edir. Gözləntilər odur ki, beynəlxalq təşkilat kimi Türk Dövlətləri Təşkilatının nüfuzu və gücü daha da artacaq. Bu əsas aparıcı dövlətlərdən biri də Azərbaycan və Qazaxıstandır. Qazaxıstanın çox böyük potensialı, enerji resursları var və bu resurslardan səmərəli istifadə üçün tərəflər birgə müxtəlif addımlar atır, yetərli tədbirləri həyata keçirirlər. Əslində, bu gün Qazaxıstanın həyata keçirdiyi siyasət elə bir siyasətdir ki, inkişaf prosesinə töhfə verə bilər. Həmçinin Qazaxıstanın heç bir dövlətlə problemi yoxdur. O, Azərbaycanla yanaşı, Ermənistanla da yaxşı münasibətlərə malikdir. Qazaxıstan vasitəçilik edərək əvvəl də bir neçə dəfə təklif irəli sürüb. Azərbaycan buna hazırdır, amma Ermənistan da hazır olmalı və real addımlar atmalıdır".
Fidan Xəlilova
16:10 11.03.2025
Oxunuş sayı: 6341
