Pakistan və Əfqanıstan müvəqqəti atəşkəs əldə edib
Pakistan və Əfqanıstan sərhəd qüvvələri, Torkham sərhəd-keçid məntəqəsində müvəqqəti atəşkəs barədə razılığa gəlib.
Crossmedia.az xarici KİV-ə istinadən xəbər verir ki, adının açıqlanmasını istəməyən pakistanlı rəsmi, fevralın 21-dən bağlanan sərhəd qapısında yaranan qarşıdurmalara görə atəşkəsin əldə olunduğunu açıqlayıb. Bu qərar, hər iki tərəfdən nümayəndə heyətlərinin iştirak etdiyi görüşdən sonra qəbul edilib.
Razılaşmaya əsasən, martın 12-nə təyin olunmuş növbəti görüşə qədər sərhəd qapısında müvəqqəti atəşkəs rejimi tətbiq ediləcək. Həmçinin, sərhədin hər iki tərəfində tikintinin dayandırılması ilə bağlı razılıq əldə olunub.
Torkham sərhəd keçid məntəqəsi, yeni keçid məntəqəsinin tikintisi ilə bağlı fikir ayrılıqları səbəbindən fevralın 21-də bağlanıb.
Nəticədə minlərlə yük maşını sürücüsü sərhədin hər iki tərəfində qapalı qalıb. 3 martda baş verən atışmada bir nəfər həyatını itirib və sakinlər təhlükəsiz yerə qaçıblar. Bu qarşıdurma və sərhəd qapısının bağlanması, iki ölkə arasında gündəlik təxminən 3 milyon dollar ticarət itkilərinə səbəb olub.
Qeyd edək ki, Torkham və Spin Boldak sərhəd qapıları, Pakistan və Əfqanıstan arasında ən sıx keçid məntəqələri hesab edilir.
Sərhəddə yaşanan silahlı qarşıdurmalar, xüsusilə dənizə çıxışı olmayan Əfqanıstana mənfi iqtisadi təsir göstərir.
03:29 10.03.2025
Oxunuş sayı: 9722
