Sahibə Qafarova-Azərbaycan türk dövlətləri ilə əməkdaşlığı gücləndirir
Milli Məclisin sədri Sahibə Qafarova Qırğızıstana səfəri çərçivəsində keçirilən görüşlər, parlamentlərarası əməkdaşlıq və Türk Dövlətləri Parlament Assambleyasının (TÜRKPA) 15-ci plenar iclasının nəticələri barədə məlumat verib.
Milli Məclisdən Crossmedia.az-a verilən məlumata görə, Sahibə Qafarova bu barədə parlamentin oktyabrın 23-də keçirilən plenar iclasında çıxış edib.
Spiker bildirib ki, Milli Məclisin nümayəndə heyəti oktyabrın 18–20-də Qırğızıstanda rəsmi və işgüzar səfərlərdə olub.
Səfər çərçivəsində Qırğızıstan Prezidenti Sadır Japarovla görüş keçirilib. Görüşdə Azərbaycanla Qırğızıstan arasında münasibətlərin xüsusi xarakter daşıdığı, Prezident İlham Əliyevin iyul ayında bu ölkəyə dövlət səfəri zamanı imzalanmış Müttəfiqlik münasibətləri haqqında Müqavilənin əhəmiyyəti vurğulanıb.
Sahibə Qafarova Qırğızıstan parlamentinin sədri Marlen Mamataliyevlə görüşündə parlamentlərarası əlaqələrin gücləndirilməsi, dostluq qruplarının fəaliyyətinin genişləndirilməsi və beynəlxalq təşkilatlarda qarşılıqlı dəstəyin davam etdirilməsi məsələlərinin müzakirə olunduğunu bildirib.
Spikerin sözlərinə görə, oktyabrın 20-də keçirilən TÜRKPA-nın 15-ci plenar iclasında türk dövlətləri arasında əməkdaşlığın genişləndirilməsi, parlament diplomatiyasının inkişafı və model qanunvericilik bazasının formalaşdırılması məsələlərinə diqqət yetirilib.
İclasda süni intellekt və rəqəmsal inkişaf məsələləri də müzakirə olunub.
“Mən dövlət başçısının rəhbərliyi ilə ölkəmizdə bu sahədə həyata keçirilən siyasət barədə məlumat verdim. Azərbaycan Respublikasının Birinci vitse-prezidenti Mehriban xanım Əliyevanın rəhbərlik etdiyi Rəqəmsal İnkişaf Şurasının fəaliyyətindən danışdım”, – deyə Sahibə Qafarova qeyd edib.
O, Milli Məclisin rəqəmsal inkişaf sahəsində hüquqi bazanın möhkəmləndirilməsi istiqamətində fəal iş apardığını da diqqətə çatdırıb.
Parlament sədri bildirib ki, nümayəndə heyətinin üzvləri TÜRKPA-nın plenar iclasında, daimi komissiyaların, qadın və gənc parlamentarilər qruplarının toplantılarında fəal iştirak ediblər.
Səfər çərçivəsində Qazaxıstan Qurultayının sədri Aybek Dadebayla da görüş keçirilib. Görüşdə parlamentlərarası əməkdaşlığın genişləndirilməsi və müttəfiqlik münasibətlərinin möhkəmləndirilməsi məsələləri müzakirə olunub.
Sahibə Qafarova nümayəndə heyətinin Bişkekdə “Ata-Beyit” Milli Tarixi Memorial Kompleksini və görkəmli yazıçı Çingiz Aytmatovun ev-muzeyini ziyarət etdiyini də bildirib.
Milli Məclisin sədri Qırğızıstana rəsmi və işgüzar səfərlərin uğurlu keçdiyini vurğulayaraq nümayəndə heyətinin üzvlərinə təşəkkür edib.
12:58 23.10.2026
Oxunuş sayı: 53
