Rubio: “Starlink” olmadan Ukrayna müharibəni uduzardı
“ABŞ Ukraynanı “Starlink” peyk rabitə sistemindən kəsmək niyyətində deyil, bunsuz Kiyev münaqişəni uduzardı”.
Crossmedia.az xəbər verir ki, bunu ABŞ dövlət katibi Marko Rubio “X” hesabında deyib.
O, Polşanın xarici işlər naziri Radoslav Sikorskinin ölkəsinin Rəqəmsallaşdırma Nazirliyinin Ukrayna üçün “Starlink”ə ildə təxminən 50 milyon dollar ödəməsi ilə bağlı bəyanatını şərh edib.
“SpaceX” şirkətini Kiyevi “Starlink” sistemdən ayırmaq istəyinə görə tənqid edən Sikorskinin dediklərinin həqiqətə uyğun olmadığını deyən Rubio sözlərinə belə davam edib:
"Siz sadəcə uydurursunuz. Heç kim Ukraynanı “Starlink”dən kəsməklə hədələməmişdi. Siz həm də minnətdar olmalısınız. Çünki “Starlink” olmasaydı, Ukrayna bu müharibəni çoxdan uduzardı və ruslar indi Polşa ilə sərhəddə olardılar."
22:58 09.03.2025
Oxunuş sayı: 11165
