Avropa İttifaqı genişmiqyaslı hərbi modernləşməyə başlayır
Brüssel Avropa Komissiyasının rəhbəri Ursula fon der Lyayen Aİ-nin müdafiə qabiliyyətini gücləndirmək strategiyasını təqdim edib. Yeni plan çərçivəsində Avropa ölkələri hərbi xərclərini artıracaq və ortaq müdafiə sənayesi siyasəti formalaşdıracaq. Bu məqsədlə ümumi büdcənin 800 milyard avro təşkil edəcəyi bildirilir.
Yeni strategiyaya əsasən, Aİ üzvləri Maliyyə Sabitliyi və İnkişaf Paktının məhdudiyyətlərinə baxmayaraq, müdafiə büdcələrini artırmaq imkanına sahib olacaqlar. Əgər üzv dövlətlər müdafiə xərclərini ÜDM-in orta hesabla 1.5%-i səviyyəsində yüksəltsə, bu dörd il ərzində 650 milyard avroluq əlavə vəsait yaradacaq.
Müdafiə sənayesinin inkişafını sürətləndirmək üçün Avropa Komissiyası 150 milyard avro dəyərində hərbi kredit mexanizminin yaradılmasını təklif edib. Bundan əlavə, Aİ ölkələri silahları birgə satın almaq imkanı qazanacaq ki, bu da iri sifarişlər hesabına qiymətləri aşağı salacaq.
Həmçinin, Avropa İttifaqının regional inkişaf fondları hərbi sənayenin gücləndirilməsinə yönəldiləcək. Yığım İttifaqı, Davamlı İnvestisiyalar və Avropa İnvestisiya Bankı vasitəsilə özəl sektorun müdafiə sahəsinə sərmayə qoyması təşviq ediləcək.
Qeyd edək ki, Aİ rəhbərliyi vurğulayıb ki, bu addımlar NATO ilə sıx əməkdaşlıq çərçivəsində həyata keçiriləcək və Avropanın kollektiv təhlükəsizliyini gücləndirəcək.
Fidan Xəlilova
14:43 04.03.2025
Oxunuş sayı: 600
