İtaliya mətbuatı ermənilərin vandallığından YAZDI
İrəvanda dağıdılmış Təpəbaşı məscidi ilə bağlı İtaliya mediasında məqalə dərc olunub.
Crossmedia.az xəbər verir ki,” Eurasiaticanews” saytında dərc edilən məqalənin müəllifi Qərbi Azərbaycan İcmasının İctimaiyyətlə əlaqələr şöbəsinin müdiri - sözçüsü Ülviyyə Zülfiqardır.
Məqalədə bildirilir ki, tarixən azərbaycanlıların məskunlaşdıqları və ərazisi kiçildilərək hazırda 16 hektar olan Təpəbaşı məhəlləsi tamamilə məhv olmaq təhlükəsi ilə üz-üzədir. Məhəllədə bir neçə məscid və azərbaycanlı ziyalıların evləri mövcud olub. Onlardan biri də hazırda acınacaqlı vəziyyətdə olan Təpəbaşı məscididir.
“Ermənistan hökuməti bu məhəllənin sökülməsi ilə bağlı qərar qəbul edib. Üstəlik, burada məscidlərə, tarixi abidələrə də hörmətsizlik edilir. Təpəbaşı məscidi (eyni zamanda, Hacı İmamverdi məscidi kimi tanınır) kafe kimi istifadə olunur və orada müştərilərə spirtli içkilər təklif edilir. Bununla da nəinki Azərbaycana məxsus abidəyə, eləcə də İslam dininə qarşı hörmətsizlik olunur.
İndiki Ermənistan ərazisində Qərbi azərbaycanlılara məxsus 300-dən çox məscid məhv edilib, Təpəbaşı məscidi dağılmış vəziyyətdədir. Hələ dağıdılmayan Göy məscidi isə başqa millətə məxsus kimi təqdim edirlər. Eyni zamanda, 600-ə yaxın qəbiristanlıq da yerlə-yeksan edilib”, - deyə müəllif vurğulayıb.
Yazıda, həmçinin qeyd edilib ki, Ermənistan Qərbi azərbaycanlılara məxsus abidələrə qarşı bu cür davranışa son qoymalı, beynəlxalq ictimaiyyət və ümumbəşəri dini qurumlar vəziyyətə səssiz qalmamalıdır. UNESCO və İslam Əməkdaşlıq Təşkilatı kimi beynəlxalq təşkilatlar, Roma Papası xüsusi həssaslıq göstərməlidirlər.
19:27 27.02.2025
Oxunuş sayı: 805
