İsrail Qəzzaya yardımı məhdudlaşdırdı: Körpələr soyuqdan ölür
Qəzza Səhiyyə Nazirliyinin baş direktoru Munir əl-Burş, bölgədəki şiddətli soyuqların nəticəsində 2 aylıq körpə Sıla Abdulkadirin həyatını itirdiyini açıqlayıb.
Crossmedia.az xarici mediaya istinadən xəbər verir ki, Burş, dünəndən etibarən soyuqdan həyatını itirən körpələrin sayının 7-ə yüksəldiyini bildirib.
Qəzzada davam edən humanitar böhranın daha da dərinləşdiyini vurğulayan Burş, İsrailin Qəzzaya hücumlarının 15 aydır davam etdiyini və bunun bölgədə ciddi fəsadlar yaratdığını qeyd edib.
O, beynəlxalq təşkilatları və qurumları təcili olaraq bölgəyə müdaxilə etməyə çağırıb.
Burş, həmçinin İsrailin səhiyyə müəssisələrini hədəf alması və körpələrin müalicəsi üçün vacib tibbi avadanlıqların məhv edilməsinin nəticəsində şiddətli soyuqdan ölümlərin baş verdiyini bildirib.
Hökumətin Qəzzadakı Media Ofisinin məlumatına görə, 2023-cü ilin oktyabrın 7-dən bu yana soyuq havadan həyatını itirən uşaqların sayı 14-ə çatıb.
İsrail ordusunun atəşkəsə baxmayaraq, humanitar yardımların Qəzzaya girişini məhdudlaşdırması və bölgədəki ağır soyuq hava şəraiti vəziyyəti daha da çətinləşdirib.
Aybəniz Səfərova
21:59 26.02.2025
Oxunuş sayı: 885
