Aİ Kiyevə “pis sövdələşmədən” imtina etmək şansı vermək istəyir
Avropa İttifaqı Kiyevə hərbi yardımı genişləndirməyə, Rusiya və Belarusa sanksiyalar təzyiqini artırmağa hazırlaşır.
"Güc vasitəsilə sülhə nail olmaq üçün biz daha sürətli hərəkət etməli, daha çox iş görməli və birlik nümayiş etdirməliyik".
Crossmedia.az xarici KİV-ə istinadən xəbər verir ki bunu Aİ-nin yüksək rütbəli rəsmisi Brüsseldə keçirdiyi brifinqdə deyib.
O, hazırda sülh sazişinin olmadığını vurğulayıb və əmin edib ki, Avropa İttifaqı Ukrayna prezidenti Vladimir Zelenskinin mövqeyini tam bölüşür, Kiyev və Brüsselin iştirakı olmadan heç bir sülh danışıqlarını qəbul etmir.
Aİ-nin Kiyevə hərbi yardımı genişləndirmək təşəbbüsü fevralın 24-də, Rusiyanın Ukraynaya genişmiqyaslı işğalının üçüncü ildönümündə təqdim olunacaq. Yeni layihə artilleriya mərmilərinin, hava hücumundan müdafiə sistemlərinin əlavə təchizatını, həmçinin Ukrayna Silahlı Qüvvələrinin bütöv briqadalarının təchiz edilməsini və təlim keçməsini nəzərdə tutur.
İclasda Rusiya Federasiyasına qarşı 16-cı sanksiyalar paketinin də qəbul ediləcəyi və Rusiyanın “kölgə donanması”na qarşı daha effektiv mübarizənin aparılması məsələsinin qaldırılacağı gözlənilir.
DW mənbələrinin bildirdiyinə görə, yeni məhdudlaşdırıcı tədbirlərə Rusiya alüminiumuna embarqo, neftin qiymətinin yuxarı həddini aşaraq Rusiyadakı 11 liman və hava limanı ilə əməliyyatlara qadağa, 13 bankın SWIFT sistemindən çıxarılması və 8 Rusiya KİV-inin Aİ-də yayım lisenziyasının dayandırılması daxildir.
18:37 23.02.2025
Oxunuş sayı: 7860
