ABŞ-ın müttəfiqləri kəşfiyyat əməliyyatlarını Trampdan necə qoruya bilər?
ABŞ-la mütəmadi olaraq kəşfiyyat məlumatları bölüşən müttəfiq ölkələr, president Donald Tramp administrasiyasının ikinci dövründə məxfi informasiyanın sızdırılması ehtimalına qarşı öz məlumatlarını qorumağın yollarını araşdırır – lakin onların seçimləri məhduddur.
Crossmedia.az xəbər verir ki, bu barədə “Politico” nəşri yazıb.
Bildirilib ki, bu ölkələr uzun müddətdir kTrampın məxfi məlumatları açıqlamaq vərdişini davam etdirəcəyindən narahat idilər: “ Kəşfiyyat əməliyyatlarına rəhbərlik etmək üçün Trampın mübahisəli namizədlərinin Konqres tərəfindən təsdiqlənməsi və həssas məlumatların artıq sızdırıldığına dair iddiaların artması bu narahatlığı daha da dərinləşdirib. Bununla belə, kəşfiyyat sahəsində əməkdaşlıq çox dərin köklərə malikdir və bu əlaqələri birdən-birə qoparmaq asan deyil. Vaşinqton adətən daha çox məlumat verir, nəinki alır və ABŞ-la Avropa kəşfiyyat agentlikləri bir çox hallarda ortaq məlumat toplama və əməliyyatlar həyata keçirir”.
"Sadəcə bir düyməyə basaraq bu prosesi dayandırmaq mümkün deyil", – deyə Şimali Avropadan olan bir müdafiə rəsmisi bildirib. O, digər şəxslər kimi, həssas kəşfiyyat əlaqələrini müzakirə etmək üçün anonimlik şərti ilə danışıb.
Bununla belə, xüsusilə insan kəşfiyyatı sahəsində – xarici ölkələrdə fəaliyyət göstərən mənbələrdən əldə edilən və ifşa olunarsa həyati təhlükə yarada biləcək məlumatlar üzrə – əlavə təhlükəsizlik tədbirləri görmək mümkündür. Məsələn, ABŞ tərəfdaşları ilə aparılan söhbətlərdə casusların yerləşdiyi yer və kimliyi barədə detalları açıq şəkildə paylaşmamaq bu tədbirlərdən biri ola bilər.
Bəzi müttəfiqlər Trampın birinci prezidentliyi dövründə bu sahədə artıq ehtiyatlı davranmağa başlamışdılar. Məsələn, o zaman Tramp İranın raket buraxılış sahəsinin məxfi peyk görüntüsünü tvit edərək yayımlamış və Rusiyanın xarici işlər nazirinə İsrailin həssas kəşfiyyat məlumatlarını ötürmüşdü.
Britaniyanın xarici kəşfiyyat xidməti MI6-ın keçmiş yüksəkvəzifəli əməkdaşı bildirib ki, Tramp administrasiyası dövründə son dərəcə həssas layihələrdə Britaniya tərəfi açıqladığı məlumatlara qarşı daha diqqətli olub. MI6 bu məsələ ilə bağlı şərh verməkdən imtina edib.
"Həmişə müəyyən bir ehtiyatlılıq var, istənilən administrasiya ilə işləyərkən bütün kitabları açıb göstərmirik", – keçmiş MI6 rəsmisi vurğulayıb. "Lakin Tramp dövründə biz daha da ehtiyatlı idik və inanmıram ki, xidmət bu dəfə daha az ehtiyatlı olsun."
Narahat olan xarici tərəfdaşlar, Tramp administrasiyası ilə əməkdaşlıq edərkən daha çox Mərkəzi Kəşfiyyat İdarəsinin (CIA) direktoru Con Ratkliff ilə işləməyə üstünlük verə bilərlər. Trampın birinci prezidentliyi dövründə Milli Kəşfiyyat Direktoru (DNI) vəzifəsində çalışan Ratkliff, kəşfiyyatın siyasiləşdirilməsi ilə bağlı əvvəlki narahatlıqlara baxmayaraq, onun ən az mübahisəli kabinet üzvlərindən biri hesab edilirdi.
Digər tərəfdən, Trampın bu dəfə kəşfiyyatın başına Tulsi Qabbardı gətirməsi bəzi tərəfdaşlar üçün əlavə narahatlıq yarada bilər.
Nabat Fərzəliyeva
14:10 23.02.2025
Oxunuş sayı: 6722
