Azərbaycan və Pakistan bu məsələdə anlaşdı - MASADA NƏLƏR VAR?
Azərbaycan və Pakistan arasında dostluq və qardaşlıq münasibətləri uzun bir tarixə malikdir. Bu əlaqələr təkcə siyasi və iqtisadi sahələrlə məhdudlaşmır, eyni zamanda mənəvi və mədəni bağlılıqlarla da möhkəmlənib.
Hər iki ölkə beynəlxalq arenada bir-birini dəstəkləyir və strateji tərəfdaşlıq münasibətlərini daim gücləndirir. Xüsusilə, Azərbaycanın müstəqilliyini bərpa etməsindən sonra ikitərəfli əlaqələr sürətlə inkişaf edib və bu gün özünün ən yüksək səviyyəsinə çatıb. Hazırda Azərbaycan və Pakistan arasında əməkdaşlıq müxtəlif sahələri, xüsusilə də hərbi və müdafiə sektorlarını əhatə edir.
Milli Məclisin deputatı Ceyhun Məmmədov Crossmedia.az saytına Pakistan-Azərbaycan arasındakı dostluq münasibəti ilə bağlı açıqlama verib:
"Azərbaycan-Pakistan arasında əlaqələr sürətlə inkişaf edir. Bu gün deyə bilərik ki, bu əlaqələr tarixdə öz inkişafının ən parlaq dövrünü yaşayır və Azərbaycan müstəqilliyini əldə etdikdən sonra başlamışdır. Onu da qeyd etməliyik ki, ötən əsrin əvvəllərində də Azərbaycan ilə Pakistan arasında münasibətlər yüksək olub. Hacı Zeynalabdin Tağıyev Pakistanda vəba xəstəliyi yayılanda buradakı qardaş və bacılarımıza öz dəstəyini göstərib. Sonrakı dövrdə Mehriban xanım Əliyevanın rəhbərlik etdiyi Heydər Əliyev Fondu da bu prosesə öz töhfəsini verir".
Deputat Azərbaycan və Pakistan arasındakı hərbi əməkdaşlıqdan danışıb:
"Bu gün bizim bütün istiqamətlərdə əlaqələrimiz sürətlə inkişaf edir və qeyd etdiyimiz kimi, özünün ən güclü, ən mütərəqqi və ən inkişaf etmiş dövrünü yaşayır. Bu gün hərbi sahədə əməkdaşlıq çox güclüdür. Türkiyə, Azərbaycan və Pakistan birliyi və həmrəyliyi də bu prosesə öz töhfəsini verir. Ölkələrimiz hərbi sahədə əməkdaşlıq edir. Azərbaycan bu yaxınlarda Pakistandan hərbi təyyarələr alıb. Bu gün həmin hərbi təyyarələr Azərbaycan ordusunun güclənməsinə öz töhfəsini verir və Azərbaycan ordusu bu texnikadan, bu silahdan istifadə edərək öz gücünü və imkanlarını daha da artırır. Bu da qeyd etdiyimiz kimi, əlaqələrimizin inkişafına müsbət təsir göstərir".
Deputat bildirib ki Azərbaycan və Pakistan arasında mənəvi birlik var:
"Azərbaycan və Pakistan liderləri Bakıda görüşüblər, ölkə liderləri arasında yüksək münasibətlər mövcuddur. Pakistan lideri Azərbaycana səfər edir, Azərbaycan Prezidenti isə Pakistana səfər edib. Bu gün biz deyə bilərik ki, əlaqələrimiz sürətlə inkişaf edir, irəliyə doğru gedir və bu əlaqələrin hərbi perspektivi də böyükdür. Bu, bölgədəki sülh prosesinə töhfə verir. Qələbə qazanmaq istəyirsənsə, güclü olmalısan. Böyük potensialın, güclü silahın və texnikan olmalıdır. Bütün bunlarla yanaşı, bizim aramızda mənəvi bir bağ, mənəvi əlaqə var. Ölkə liderlərinin mövqeləri də bizim bütün sahələrdə əlaqələrimizin güclənməsinə öz töhfəsini verir".
Ayhan Ağarzayev
19:14 21.02.2025
Oxunuş sayı: 5576
