Ölkə ərazisində güclü qar və külək müşahidə olunur
Milli Hidrometeorologiya Xidmətinin fevralın 21-i saat 08:00-a olan məlumatına əsasən, ölkə ərazisində qeyri-sabit hava şəraiti davam edir. Hazırda Bakıda və Abşeron yarımadasında, eləcə də ölkənin əksər bölgələrində qar yağır.
Xidmətin məlumatına görə, ən çox qar örtüyü Zaqatalanın Əlibəy kəndində (71 sm), Qaxın Sarıbaş kəndində (50 sm), Gədəbəydə (45 sm) və Şəkidə (25 sm) qeydə alınıb. Paytaxtda isə qarın hündürlüyü 7 sm-dir.
Bundan əlavə, şimal-qərb küləyi güclənərək Bakıda və Abşeron yarımadasında 25 m/s sürətə çatıb. Dənizdə dalğanın hündürlüyü 5,1 metr təşkil edir.
Havanın minimal temperaturu Bakıda və Abşeron yarımadasında 3 dərəcə şaxta, Aran rayonlarında 1 dərəcə şaxta, Naxçıvanda 9 dərəcə şaxta, dağlıq rayonlarda isə 15 dərəcəyədək şaxta qeydə alınıb.
08:53 21.02.2025
Oxunuş sayı: 7108
