Həkim xəbərdarlıq edir: Qarın piylənməsi ciddi xəstəliklərin xəbərçisidir
Bakıda ORZAX Azərbaycan şirkətinin təşkilatçılığı ilə “Metabolik sindromda qida əlavələri: elmi və tətbiqi” mövzusunda elmi-praktik tədbir baş tutub. Tədbirdə Azərbaycan Endokrinologiya və Diabetologiya Terapevtiv Təlimat Assosiasiyasının sədr müavini Dr. Hidayət Məmmədzadə metabolik sindrom və onun qaraciyər piylənməsi ilə əlaqəsi barədə geniş məruzə ilə çıxış edib.
Crossmedia.az xəbər verir ki, Dr. Hidayət Məmmədzadə çıxışında vurğulayıb ki, 2020-ci ildən etibarən metabolik sindrom beynəlxalq xəstəliklərin təsnifatında ayrıca xəstəlik kimi qeyd olunur:
“Bu gün mən metabolik sindrom çərçivəsində qaraciyər piylənməsindən bəhs etməyə çalışacağam. Burada əsas diqqətimizi qeyri-alkoqollu mənşəli qaraciyər piylənməsinə yönəldəcəyik. Əgər gündəlik spirtli içki qəbulu kişilər üçün 40 qramdan, qadınlar üçün isə 20 qramdan çox deyilsə və bu fonda qaraciyər piylənməsi müşahidə olunursa, bu, artıq qeyri-alkoqollu mənşəli qaraciyər piylənməsi adlandırılır. Beynəlxalq konsensus nəticəsində bu vəziyyət metabolik disfunksiyalı qaraciyər piylənməsi (MAFLD) kimi təsnif edilir”.
Metabolik sindromun təsnifatına toxunan mütəxəssis qeyd edib ki, bu sindrom yalnız qaraciyər piylənməsi ilə məhdudlaşmır və digər ciddi metabolik pozuntuları da əhatə edir:
“Burada insulin rezistentliyi, şəkərli diabet və hipertoniya kimi xəstəliklərin inkişaf riski artır. Metabolik sindrom, sadə dillə desək, bir sıra metabolik dəyişikliklərin kompleks şəkildə müşahidə olunmasıdır. Diaqnoz üçün əsas kriteriyalar arasında abdominal piylənmə, dislipidemiyalar, karbohidrat mübadiləsi pozğunluğu, arterial hipertenziya və insulin rezistentliyi var”.
Mütəxəssis metabolik sindromun əsas kriteriyalarını sadalayıb:
Abdominal piylənmə (bel ölçüsü):
Qadınlarda 80 sm-dən yuxarı, kişilərdə 94 sm-dən yuxarı (bəzi mənbələrdə 90 sm sərhədi);
Dislipidemiyalar;Trigliserid səviyyəsi 150 mq/dl-dən yuxarı, HDL xolesterolun qadınlarda 50 mq/dl, kişilərdə 40 mq/dl-dən aşağı olması;
Karbohidrat mübadiləsi pozğunluğu:
Açlıq qan şəkəri 100 mq/dl və ya daha yüksək (prediabet və ya 2-ci tip diabet);
Arterial hipertenziya:
Sistolik təzyiq 130 mmHg və ya daha yüksək, Diastolik təzyiq 85 mmHg və ya daha yüksək
İnsulin rezistentliyi və ya metabolik disfunksiya əlamətləri
Dr. Məmmədzadə bildirib ki, bu kriteriyalardan bel ölçüsü mütləq olmaqla, ən azı daha ikisinin mövcudluğu metabolik sindrom diaqnozu üçün kifayətdir:
“Məsələn, bir şəxsin bel ölçüsü 90 sm-dirsə, HDL səviyyəsi 40 mq/dl-dən aşağıdırsa və açlıq qan şəkəri 100 mq/dl civarındadırsa, bu, metabolik sindrom göstəricisidir”.
Yaş artdıqca qarın nahiyəsində piy toplanmasının artdığını vurğulayan həkim, bu amilin metabolik sindrom riskini artırdığını bildirib:
“Metabolik sindromun erkən mərhələdə aşkarlanması çox vacibdir. Çünki erkən müdaxilə və həyat tərzinin dəyişdirilməsi ilə bu prosesin qarşısını almaq mümkündür. Unutmayaq ki, xəstəliyin vaxtında diaqnozu və profilaktik tədbirlərin görülməsi gələcəkdə ciddi fəsadların qarşısını almağa imkan verir”.
Tədbir iştirakçıları metabolik sindrom və onunla mübarizədə qida əlavələrinin rolu barədə ətraflı məlumat əldə ediblər. Tədbirin sonunda Dr. Məmmədzadə iştirakçıların suallarını cavablandırıb.
09:03 16.02.2025
Oxunuş sayı: 2953
