Professor: Verilişlərə dəvət olunan qonaqların səviyyəsi, onların ictimai mövqeyi nəzərə alınmalıdır
Televiziya yalnız informasiya mənbəyi deyil, həm də cəmiyyətin mənəvi dəyərlərini, mədəni səviyyəsini və ictimai davranış normalarını formalaşdıran mühüm vasitədir. Buna görə də efirdə yayımlanan hər bir veriliş, iştirakçılar və onların söylədikləri fikirlər ictimai məsuliyyət daşıyır.
Audiovizual Şura qohumlararası nikahla bağlı toy şənliyi yayımladığına görə MTV kanalı barəsində protokol tərtib edərək cərimə olunması üçün məhkəməyə müraciət edib.
Bildirilib ki, oktyabrın 22-də telekanalın efirində saat 20:31-21:24 arasında yayımlanan "Toya gəlmişik" proqramı zamanı "Uşaqların zərərli informasiyadan qorunması haqqında" qanunun müvafiq maddəsinin tələbi pozulub. Çünki verilişin yayımı zamanı bölgələrin birində keçirilmiş, qohumların (xalaqızı və xalaoğlunun) toy məclisi nümayiş etdirilib.
Məlumatda MTV kanalının aid olduğu "MUZ TV Azərbaycan" MMC-nin səlahiyyətli nümayəndəsinin oktyabrın 24-də bununla bağlı Audiovizual Şuraya dəvət edildiyi vurğulanıb.
Xatırladaq ki, İnzibati Xətalar Məcəlləsinin müvafiq maddəsinə əsasən bu pozuntuya görə hüquqi şəxslər 3 min manatdan 4 min manatadək məbləğdə cərimə edilir.
Son dövrlərdə bəzi telekanallarda etik normaların pozulması, efirdə qeyri-peşəkar və ziddiyyətli çıxışların artması cəmiyyətdə narazılıq doğurur. Bu kimi halların qarşısının alınması üçün hansı tədbirlər görülməlidir?
Əməkdar jurnalist, tanınmış telejurnalist, professor Qulu Məhərrəmli bu barədə Crossmedia.az-a açıqlama verib. Açıqlamasında bildirib ki, bunun üçün xüsusi tədbir görməyə ehtiyac yoxdur: "Sadəcə, həmin televiziya kanalının rəhbərliyi — prodüser, redaktor, rejissor və ümumiyyətlə yaradıcı heyət efirdə etik qaydalara riayət olunmasına ciddi nəzarət etməlidir. Çünki unutmamalıyıq ki, televiziya ekranındakı davranışımız bizim həyatda göstərdiyimiz davranışın davamıdır, hətta ondan da daha məsuliyyətli olmalıdır. Bu məsələlərdə peşəkarlıq əsas meyar kimi götürülməlidir. Verilişlərə dəvət olunan qonaqların səviyyəsi, onların ictimai mövqeyi nəzərə alınmalıdır. Əgər hər təsadüfi şəxsi efirə çıxarıb “ekspert” kimi danışdırsaq, təbii ki, bu cür halların qarşısını almaq mümkün olmayacaq’’.
Q. Məhərrəmli qeyd edib ki, unutmaq olmaz ki, bizim milli və ailə dəyərlərimiz var və onlar qorunmalıdır: "Efirdə etik normaların pozulması yolverilməzdir. Buna görə də, hər bir proqram üçün məsul şəxslər öncədən hazırlıq aparmalı, mövzuların çərçivəsini, etik ölçüləri müəyyənləşdirməli və iştirakçılara xəbərdarlıq etməlidirlər. Xüsusilə narahatlıq doğuran məqam odur ki, bəzi insanlar efirdə fürsətdən istifadə edərək ağlına gələni danışırlar. Halbuki televiziya ictimai tribunadır, insanlar oradan ədəb, mədəniyyət, ünsiyyət qaydaları öyrənməlidirlər. Bütün bunlara diqqət edilmədikdə, suallar və narazılıqlar yaranır’’.
Sevinc Yarməmmədova
15:37 27.10.2025
Oxunuş sayı: 2388
