Ermənistan- Rusiya münasibətlərində nonsens: "Siyasi zəmində fikir ayrılıqları olsa da, iqtisadi sahədə əməkdaşlıq güclənir"
Ermənistanın keçmiş prezidenti, hərbi cinayətkar Robert Köçəryan deyib ki, Ermənistan həlledici anda Rusiyanı atıb, düşmənin düşərgəsinə keçdi.
Onun sözlərinə görə, Rusiya Ukraynada uğursuzluğa düçar olduğu dövrdə Ermənistan hakimiyyəti onun məğlub olduğunu və dağılmaq üzrə olduğunu düşündü və “sonuncu vaqona minməyin" tam zamanı olduğunu hesab etdi: "Lakin bu qərarla Rusiyanın vasitəçilik mandatı sıfıra endirildi. Qarabağın təslim edilməsi iki mərhələdə baş verdi. Birinci – 2018-2020-ci illərdə, müharibəyə qədər. İkinci isə 2020-ci ildən 2023-cü ilin sentyabrına qədər. Baş nazir Nikol Paşinyan 2019-cu ildə çox maraqlı və məqbul bir təklifi görməzdən gəldi və əslində, danışıqlara sıfır nöqtədən başlayacağını bildirdi".
Bu, ilk belə hal deyil. Müxalifət lideri əvvəllər də dəfələrlə Paşinyanı ittiham edib.
Onun bu iddiaları barədə Crossmedia.az-a danışan politoloq Elxan Şahinoğlu söyləyib ki, Ermənistanın xarici və təhlükəsizlik siyasətində qeyri-müəyyənlik davam edir: " Ermənistan keçmiş prezidenti Robert Köçəryan gah Qərbə, gah da Rusiyaya yaxınlaşmaq istəyir. Bir tərəfdən Kollektiv Təhlükəsizlik Müqaviləsi Təşkilatından (KTMT) uzaqlaşacağını bildirir, digər tərəfdən isə fəaliyyətini davam etdirdiyini açıqlayır. ABŞ-la münasibətlərə gəlincə, Ermənistanın Bayden administrasiyası dövründə qurduğu əlaqələrin davam edib-etməyəcəyi sual altındadır. Vaşinqtonla bağlanan müqavilələrin taleyi də naməlumdur".
Ekspertin sözlerinə görə Ermənistan hələ də iqtisadi cəhətdən Rusiyadan asılı vəziyyətdədir: " Ötən il iki ölkə arasında 12 milyard dollarlıq ticarət dövriyyəsi qeydə alınıb. Maraqlıdır ki, son iki il ərzində bu göstərici 4-5 dəfə artıb. Analitiklər bunu Rusiyanın sanksiyalar altında olması ilə əlaqələndirirlər. İddiaya görə, Moskva sanksiyalardan yan keçmək üçün Ermənistandan tranzit ölkə kimi istifadə edir. Ermənistanın bu prosesdə iştirakının Paşinyanla razılaşdırıldığı ehtimal edilir. Bəzi ekspertlər isə Ermənistan və Rusiya arasındakı gərginliyin əslində siyasi şou olduğunu düşünürlər. Çünki siyasi zəmində fikir ayrılıqları olsa da, iqtisadi sahədə əməkdaşlıq güclənir. Bu kontekstdə Ermənistanın Vaşinqtonla yaxınlaşmasının Rusiya Prezidenti Vladimir Putin üçün ciddi problem yaratmadığı da vurğulanır".
Məhəmməd Vəliyev
17:27 17.02.2025
Oxunuş sayı: 3800
