"Azərbaycan qadınları dövlətdə yüksək vəzifələrdə təmsil olunurlar"- Rəy
Bu il “Qadınlar və qızlar elmdə” Beynəlxalq Gününün təsis olunmasının 10-cu ildönümüdür. BMT Baş Assambleyasının 2015-ci il 22 dekabr tarixli qətnaməsinə əsasən qeyd edilən bu gün qadınların və qızların elm və texnologiyadakı rolunun vacibliyini vurğulayır.
Azərbaycan qadınları tarixən cəmiyyətin inkişafında mühüm rol oynayıb və bu gün də elm, siyasət, incəsənət, iqtisadiyyat və digər sahələrdə böyük nailiyyətlər əldə edirlər. Qadınlarımız, dövlətin də yaratdığı imkanlar sayəsində təhsil almaq, karyera qurmaq və beynəlxalq arenada ölkəmizi layiqincə təmsil etmək imkanı qazanıblar. Onlar təkcə ölkə daxilində deyil, dünyanın müxtəlif ölkələrində elmi, mədəni və ictimai fəaliyyətləri ilə tanınırlar.
Mövzu ilə bağlı AMEA-nın Nəsimi adına Dilçilik İnstitutunun şöbə müdiri professor Sevinc Əliyeva Crossmedia.az saytına fikirlərini bildirib:
"Bu gün elmdə fəaliyyət göstərən qadınlarımızın uğurları bizi çox sevindirir və qürurvericidir. Azərbaycan elmini müxtəlif sahələrdə təmsil edən qadınlarımız var və onların uğurları təkcə respublika sərhədləri ilə məhdudlaşmır. Azərbaycanın qadın alimləri müxtəlif beynəlxalq konferans və tədbirlərdə ölkəmizi yüksək səviyyədə təmsil edirlər".
S. Əliyeva qadınlarımızın yüksək vəzifələrdə təmsil olunmasından danışıb:
"Azərbaycan qadınları bu gün dövlət qurumlarında müxtəlif vəzifələrdə təmsil olunurlar. Azərbaycan Respublikasının qanunları və yaradılan rahat mühit
qadınlara heç bir maneə olmadan öz fikir və mülahizələrini bildirmək, müzakirələrdə iştirak etmək imkanı yaradır. Bu gün Milli Məclisdə təmsil olunan qadın millət vəkillərinin sayı əvvəlki illərə nisbətən artıb. Azərbaycan Respublikasının birinci vitse-prezidenti Mehriban xanım Əliyevanın uğurlu fəaliyyəti hər birimiz üçün ən gözəl örnəkdir. Məhz onun sayəsində bir sıra sahələrdə yüksək nəticələr əldə olunub, həmçinin mədəniyyətimiz dünya səviyyəsində təmsil olunur, Azərbaycan muğamı dünyada daha geniş səviyyədə tanınıb və şöhrət qazanıb".
Ayhan Ağarzayev
15:12 12.02.2025
Oxunuş sayı: 5204
