“Ermənistan parlamentində elə bir qalmaqalal olacaq ki...”- Ekspertdən iddia
Ermənistan parlamenti Avropa İttifaqına (Aİ) üzvlük prosesinin başlanması ilə bağlı qanun layihəsini müzakirəyə çıxarmağa hazırlaşır. Qanun layihəsi fevralın 11-dən 14-dək keçiriləcək plenar iclasın gündəliyinə daxil edilib.
Məlumata görə, Ermənistan hökuməti yanvarın 9-da sənədi təsdiqləyib və daha sonra parlamentin müvafiq komitəsi qanun layihəsinə müsbət rəy verib. Hazırda məsələ parlamentdə müzakirəyə çıxarılır.
Məsələ ilə bağlı siyasi şərhçi Kənan Novruzov Crossmedia.az-a açıqlamasında bildirib ki, bu addım Ermənistanda ciddi siyasi gərginliyə səbəb ola bilər:
“Ümumiyyətlə, Ermənistanın Aİ-yə üzvlüyü uzun müddətdir müzakirə olunur və artıq parlamentdə bu barədə qanun layihəsi təqdim ediləcək. Düşünürəm ki, parlamentdə bu məsələyə dair ciddi qarşıdurma yaranacaq. Müxalifətlə iqtidar üz-üzə gələcək, xüsusilə də müxalifət qanun layihəsinə qarşı çıxacaq, iqtidar isə onu dəstəkləyəcək. Biz artıq Ermənistan parlamentində belə gərginliklərin şahidi olmuşuq. Mümkündür ki, bu məsələ hətta əlbəyaxa davalara qədər gedib çıxsın”.
K.Novruzovun sözlərinə görə, qanun layihəsinin parlamentdə qəbul olunması gözlənilsə də, bu, Ermənistanın Aİ-yə üzv olacağı anlamına gəlmir:
“Ermənistanın üzvlük prosesi uzun vaxt tələb edəcək. Baş nazir Nikol Paşinyan da anlayır ki, bu məsələ hələlik yalnız siyasi gündəmin bir hissəsidir. Əgər gələcəkdə real üzvlük fürsəti yaransa, Paşinyan daha ehtiyatlı davranacaq. Çünki Rusiya faktoru var. Ermənistanın Aİ-yə üzv olması üçün Avrasiya İqtisadi İttifaqından çıxması tələb olunur və bu, Moskva ilə ciddi toqquşma riski yarada bilər”.
Siyasi şərhçi qeyd edib ki, hazırda Ermənistanın əsas məqsədi Aİ-nin diqqətini cəlb etmək və maliyyə yardımları qazanmaqdır:
“Ermənistan hələ də “iki stulda oturmağa” çalışır. İndiki mərhələdə bu məsələ əsasən bəyanatlar səviyyəsindədir və konkret nəticələr yoxdur. Hazırda Aİ-yə üzvlük məsələsinin gündəmə gətirilməsi Ermənistanın Avropadan müəyyən dəstək almaq istəyilə bağlıdır. Lakin nə Paşinyan, nə də Kreml bu prosesin real nəticələr doğuracağına inanmır. Ona görə də tərəflər hələlik ehtiyatlı mövqe tutur”.
Maral Şahverdili
13:30 11.02.2025
Oxunuş sayı: 4003
