Gündəm
Rusiya Azərbaycanı “İskəndər”lə hədələdi: Bakının cavabı ağır ola bilər
Azərbaycan əleyhinə sərt çıxış edən rusiyalı politoloq, azərbaycanofob Nikolay Silaevin təxribatçı bəyanatı cəmiyyətdə geniş narazılıq yaradıb. O, Azərbaycana qarşı “İskəndər” raketi ilə zərbə endirmək təhdidini səsləndirərək iki ölkə arasındakı münasibətləri daha da gərginləşdirən açıqlama ilə çıxış edib. Silaevin bu bəyanatı təkcə qərəzli yanaşmanın deyil, eyni zamanda beynəlxalq hüquq prinsiplərinə zidd bir addımın təşviqi kimi qiymətləndirilir. Belə açıqlamalar, xüsusilə, Azərbaycanın suverenliyinə qarşı açıq-aşkar təhdid xarakteri daşıyır və regionda sülhə yönəlmiş səylərə maneə törədir. Azərbaycanın milli maraqlarına qarşı yönəlmiş bu cür çıxışlar həm Rusiya-Azərbaycan münasibətlərinə, həm də geniş mənada regional təhlükəsizliyə xələl gətirə bilər.
Bəyanatın hansı əsaslarla səsləndirilməsi ilə bağlı siyasi şərhçi Elçin Alıoğlu Crossmedia.az-a açıqlama verib.
Onun sözlərinə görə, bu bəyanat Beynəlxalq “Valday” Diskussiya Klubunun müzakirələri zamanı səsləndirilib. O bildirib ki, “Valday” Klubunun bu bəyanatla heç bir əlaqəsi yoxdur:
“Silaev vaxtilə regional araşdırmalar mərkəzlərindən birində çalışıb və həmin təşkilat ləğv edilib. Yenidən gündəmə gəlmək üçün anti-Azərbaycan ritorikasını seçib. Azərbaycanın ərazisinə “İskəndər” raketi atmaq mümkündür. Dünyada bu cür yanaşmalar mövcuddur. Amma belə addımların cavabı və bədəli çox ağırdır. Silaev və onun ilk dəstəsi, habelə Kremlə yaxın olmayan dairələr bu mövzularda öz məqsədlərinə çatmağa çalışırlar”.
E.Alıoğlu həmçinin bildirib ki, Azərbaycan əleyhinə başladılmış son qarayaxma kampaniyasının arxasında Rusiya Federasiyasının müəyyən mərkəzləri dayanır:
“Bu mərkəzlərin məqsədi Azərbaycanı AZAL təyyarəsi ilə bağlı qəti mövqedən çəkindirməyə çalışmaqdır. Amma bu, alınmayacaq! Biz bu məsələyə sırf hüquqi çərçivədə baxırıq. Bizim məqsədimiz yalnız ədalətin bərpasıdır. Rusiya ilə bağlı hər hansı əlavə ittiham irəli sürmürük. Biz sadəcə Qroznu səmasında vurulan təyyarəmizin səbəbkarlarının cəzalandırılmasını və təzminat tələb edirik. Bu tələb Azərbaycan hakimiyyətinin deyil, Azərbaycan xalqının tələbidir”.
Bu cür qeyri-adekvat münasibətlərin davam etməsi ilə bağlı siyasi şərhçi qeyd edib ki, bu, iki ölkə arasında ciddi çatlara səbəb olacaq:
“Bu çatların uçuruma çevrilməməsi üçün Rusiya əlindən gələni etməlidir. Çünki bu cür təbliğat və yalanlar artdıqca, bunun əvəzini də Rusiya ödəyəcək. İndi Rusiya üçün dost itirmək vaxtı deyil. Əksinə, münasibətləri sabit saxlayan ölkələrlə əməkdaşlığı gücləndirmək vaxtıdır. Nəhayət, unutmayaq ki, bu yanaşmalar Rusiya xalqına təhqirdir”.
Fidan Hacızadə
19:16 25.01.2025
Oxunuş sayı: 9275
