Müharibənin ağır reallıqlarını göstərən "Xeyir Xəbər" tamaşası təqdim edilib
Sumqayıt Dövlət Dram Teatrında təqdim olunan “Xeyir Xəbər” tamaşası, Azərbaycan Respublikası Mədəniyyət Nazirliyinin dəstəyi ilə hazırlanıb. Əməkdar incəsənət xadimi Əli Əmirlinin yeni pyesi əsasında qurulan əsərin rejissoru gənc rejissor Fuad Cavadzadədir. Tamaşa, 44 günlük Vətən müharibəsində qazandığımız qələbəyə, şəhidlərimizin əziz xatirəsinə, qazilərimizə və veteranlara ithaf olunub.
Tamaşanın süjeti bir ailənin oğullarının şəhid olması xəbəri ilə üzləşməsindən başlayır. Ata bu xəbəri "Xeyir Xəbər" adlandıraraq oğlunun qəhrəmanlığı ilə qürur duyur. Lakin sonradan əsgərin əsir düşdüyü və sağ olduğu məlum olur. Ailə sevinc və kədər arasında mürəkkəb duyğular yaşayır. Tamaşa əsgərin azad olunub ailəsinə qovuşması ilə bitir. Rejissor müharibənin ağır reallıqlarını göstərməklə yanaşı, ümid, vətənpərvərlik və ailə bağlarının gücünü vurğulayır.
Bir hissəli qəhrəmanlıq dramının bədii rəhbəri Xalq artisti Firudin Məhərrəmov, quruluşçu rejissoru Fuad Cavadzadə, quruluşçu rəssamı Nizami Dadaşov, musiqi tərtibatçısı isə Telman Qəniyevdir. Aktyorların təbii oyunu, musiqi və dekorasiya tamaşanı daha təsirli edir. Rolları Əməkdar artist Elmira Kərimova və digər istedadlı aktyorlar ifa ediblər.
Tamaşa əvvəlcə Sumqayıt ictimaiyyətinə, daha sonra “Bölgə Teatrlarının Bakı Premyeraları” layihəsi çərçivəsində Azərbaycan Dövlət Milli Gənc Tamaşaçılar Teatrında təqdim edilmiş və Mədəniyyət kanalında canlı yayımlanıb.
Ayan Sədi
15:59 24.01.2025
Oxunuş sayı: 15630
