Ermənistan Rusiya ilə səhvini düzəldir: KTMT-dən kömək umulur- ŞƏRH
Ermənistanın Xarici Kəşfiyyat Xidməti (XKX) İrəvanın Kollektiv Təhlükəsizlik Müqaviləsi Təşkilatında (KTMT) üzvlüyünün dondurulması prosesinin dayandırılması üçün səas yoxdur.
Bu barədə XKX-nin regiondakı hərbi-siyasi vəziyyətə dair ilk hesabatında deyilir.
"Təsis müqaviləsinin müddəalarına baxmayaraq, KTMT-nin nizamnamə məqsədləri olan Cənubi Qafqazın problemlərinə cavab vermək qabiliyyətinin olmaması 2025-ci ildə çətin ki dəyişsin. Hesab edirik ki, Ermənistanın KTMT-də üzvlüyünün dondurulması üçün əsasların 2025-ci ildə aradan qalxması ehtimalı azdır", - hesabatda qeyd olunub.
Ermənistanla KTMT arasında münasibətlər son illər, demək olar, “soyuq müharibə” səviyyəsindədir. Rəsmi İrəvan təşkilatı boykot edib. Buna baxmayaraq, Ermənistan KTMT-dən hüquqi cəhətdən də çıxacağını desə də, hələ ki, bunun işartıları görünmür. Yəni çox vaxt olduğu kimi, indi də Ermənistanın əməli ilə sözü arasında ziddiyyət müşahidə olunur.
Ermənistanla KTMT-nin gələcək münasibətləri barədə Crossmedia.az-a danışan siyasi şərhçi Asif Nərimanlı bildirib ki, Ermənistan indiyə qədər KTMT- dən çıxmaq istiqamətində addım atırdı. Rəsmi İrəvan Azərbaycanın Ermənistana guya hücum etdiyini bildirir və KTMT-dən çıxmasını da bu təşkilatın öhdəliyini yerinə yetirməməsi ilə əlaqələndirirdi: “Məqsəd daha çox Paşinyan hakimiyyətinin qərbyönümlü siyasət yürütməsi və Qərbdən dəstək alması idi. Hərbi və siyasi baxımdan Rusiyaya qarşı alternativlərini formalaşdırmaq idi. Bəlli idi ki, Qərb Ermənistana dəstək əvəzində KTMT-dən çıxmaqla bağlı şərt qoyub. Bu, son dövrlərdə, yəni 2023-cü ildən bəri daha intensiv müşahidə olunur. Ermənistanın silahlandırılmasında Fransa başda olmaqla Qərb ölkələri daha aktiv şəkildə iştirak edir. Hətta Ermənistanın silahlandırılmasında da rəsmi Parisin lobbiçilik fəaliyyəti var idi”.
Analitikin sözlərinə görə, indi rəsmi İrəvanın təşkilatdan çıxmasını yenidən gündəmə gətirməsi birbaşa geosiyasi proseslərin dəyişməsi ilə bağlıdır: “Bu məsələdə ABŞ-da Respublikaçıların lideri Donald Trampın hakimiyyətə gəlməsinin xüsusi rolu var. Çünki Trampa qədər, yəni Cozef Bayden administrasiyası dövründə ABŞ və Avropa İttifaqı (Aİ) birlikdə İrəvana dəstək verirdilər. Hətta Azərbaycanla danışıqlarda Bayden administrasiyası balansı Ermənistanın xeyrinə dəyişmişdir. Rezonasiyası tamamilə dəyişmişdi. Bir növ Ermənistanın əli güclü idi. indi Tramp administrasiyasının Ermənistana həmin dəstəyi verməyəcəyi proqnozlaşdırılır”.
Şərhçi, həmçinin qeyd edib ki, Tramp administasiyası üçün Cənubi Qafqaz prioritet istiqamət olmaya da bilər: “Bu isə regionda qüvvələr balansına təsir edə bilər. Bu is regional balansa təsir edir. Bu baxımdan Ermənistanın KTMT məsələsini yenidən gündəmə gətirməsi təsadüfi deyil. Ola bilsin, Ermənistan yenidən Rusiyaya yaxınlaşmaq barədə düşünür.
A.Nərimanlının fikrincə, İranın Yaxın Şərqdəki məğlubiyyətindən sonra onsuz da Cənubi Qafqazda təsir imkanları aşağı idi: “İndi daha da zəifləyib. İran, həmçinin Azərbaycanla qarşıdurmaya da getməkdə maraqlı görünmür. Son proseslər də bunu deməyə əsas verir. Ermənistanın yenidən Rusiyaya qarşı çıxması bu dövlətin regionda tək qalması deməkdir”.
Fidan Hacızadə
15:51 23.01.2025
Oxunuş sayı: 908
