Azərbaycan BMT-yə üzvlük haqqını tam ödəyən ilk ölkələr sırasındadır
Azərbaycan BMT-nin 2025-ci ilin büdcəsi üçün nəzərdə tutulmuş üzvlük haqqını tam ödəyib.
Bunu BMT Baş katibinin sözçüsünün müavini Farhan Haq deyib.
F.Haq bildirib ki, son bir həftədə Azərbaycanla yanaşı, Avstraliya, Finlandiya, İrlandiya, Niderland, İsveç və Ukrayna BMT-nin bu ilin büdcəsi üçün nəzərdə tutulmuş üzvlük haqqını tam ödəyib.
Azərbaycan ötən illərdə olduğu kimi bu il də BMT-nin büdcəsi üçün üzvlük haqqını ödəyən ilk ölkələr sırasında yer alıb. Bu günə qədər ölkəmizlə yanaşı, BMT-yə üzv olan daha 24 dövlət ödənişi həyata keçirib.
Qeyd edək ki, BMT-nin büdcəsi 193 dövlətin ödədiyi üzvlük haqqı hesabına formalaşır. Üzvlük haqqının məbləği bir neçə meyar əsasında müəyyən edilir ki, bunlardan da başlıcası ölkənin ödəmə qabiliyyətidir. Yığılan vəsait ilk növbədə BMT-nin mərkəzi orqanlarının - Baş Assambleyanın, xüsusi komitələrin və katibliyin inzibati xərclərinin ödənilməsinə yönəldilir. BMT-nin xərclərinin əhəmiyyətli hissəsi sülhməramlı missiyalara sərf olunur.
Xatırladaq ki, Azərbaycan 1992-ci ilin martın 2-də BMT Baş Assambleyasının 46-cı sessiyasında qəbul edilən qətnamə ilə təşkilata daxil olub. Bununla bağlı BMT-nin Nyu-Yorkdakı qərargahının qarşısında Azərbaycanın Dövlət bayrağı qaldırılıb, mayın 6-dan isə təşkilatın yanında ölkəmizin daimi nümayəndəliyi fəaliyyətə başlayıb. (report)
23:09 22.01.2025
Oxunuş sayı: 8010
