“Ermənistanın ABŞ-la strateji müttəfiqliyi o deməkdir ki...” - ŞƏRH
Ermənistanın müdafiə naziri Suren Papikyan, Cənubi Qafqaz regionunda gərginliyin artması üçün heç bir əsasın olmadığını bildirib. O, ölkəsinin balanslaşdırılmış siyasət yolu ilə öz sərhədlərinin təhlükəsizliyini və toxunulmazlığını təmin etməyə çalışdığını vurğulayıb. Papikyan Ermənistan və ABŞ arasında müdafiə sahəsində əməkdaşlığın davam etdiyini və bu əməkdaşlığın iki ölkə arasında imzalanmış strateji tərəfdaşlıq sənədinə uyğun şəkildə irəlilədiyini qeyd edib. O bildirib ki, müdafiə sahəsində bir sıra istiqamətlərdə irəliləyiş əldə edilib və proses ümumilikdə müsbət dinamika nümayiş etdirir.
Papikyanın dediklərini Crossmedia.az-a şərh edən politoloq Əliqismət Bədəlov Ermənistanın ABŞ-lə imzaladığı strateji tərəfdaşlıq sənədinin ölkənin üçüncü bir dövlətin himayəsinə sığınmaq niyyətində olduğunu göstərdiyini vurğulayıb: “İki gün əvvəl Vaşinqtonda, ABŞ Dövlət Departamentinin binasında Ermənistanın xarici işlər naziri Ararat Mirzoyan və ABŞ-nin dövlət katibi Antoni Blinken arasında strateji tərəfdaşlıq sənədi imzalanıb. Bu hadisə Ermənistanda böyük coşqu ilə qarşılandı və ölkənin üçüncü bir dövlətin himayəsinə sığınmaq niyyətində olduğunu göstərir”.
Ə.Bədəlov bildirib ki, SSRİ-nin süqutundan sonra müttəfiq respublikalar müstəqil dövlət kimi çətinliklərə baxmayaraq, öz yollarını seçdilər: “Azərbaycan bu dövlətlər arasında ən çox inkişaf edənlərdən biri oldu. Ermənistan isə həmin dövrdən etibarən daim başqa bir dövlətin himayəsinə sığınmağa çalışdı və müstəqil dövlət kimi inkişaf edə bilmədi. Ermənistanda Nikol Paşinyanın hakimiyyətə gəlməsindən sonra Ermənistan demokratik inkişaf yoluna qədəm qoydu. Amma ölkənin işğalçılıq siyasəti onun qanına hopmuşdu. Buna baxmayaraq, müstəqillik yolunda irəliləməyə çalışsa da, Ermənistanın gözü daim başqa dövlətlərin torpaqlarında oldu”.
Politoloq əlavə edib ki, Ermənistan Rusiya təsirindən çıxmağa çalışsa da, Fransanın himayəsinə girdi. Fransa isə öz müstəmləkəçilik siyasətindən istifadə edərək, Ermənistanı da bu yolda irəliləməyə vadar etdi. Lakin Ermənistan, Azərbaycan torpaqlarına göz dikməyə davam etdi. “Nəhayət, Azərbaycan ordusu Ermənistanı işğal etdiyi ərazilərdən tamamilə uzaqlaşdırdı və Ermənistan böyük bir məğlubiyyət yaşadı. Fransadan dəstək ala bilməyən Ermənistan indi də ABŞ-dən kömək gözləyir. Onlar ümid edirlər ki, ABŞ-lə strateji tərəfdaşlıq imzalamaqla, Cənubi Qafqazda lider dövlətə çevriləcəklər. Amma ABŞ-nin bu dəstəyinin, Ermənistanın inkişafına əhəmiyyətli bir töhfə verəcəyi inandırıcı deyil”.
Ə.Bədəlovun fikrincə, ABŞ-də güclü erməni lobbisinin olması, Ermənistanın həmin ölkə ilə sıx əlaqələr qurmasına şərait yaradır. Lakin bu əlaqələr, Ermənistanın sülh yolunda irəliləməsi üçün kifayət deyil: “Azərbaycan ordusu belə ittifaqlardan çəkinmir və öz torpaqlarını müdafiə etməyə hazırdır. ABŞ-Ermənistan strateji tərəfdaşlıq sənədi, Cənubi Qafqazda sülhə və sabitliyə heç bir təhlükə yaratmır. Azərbaycan güclü və qüdrətli bir orduya malikdir”.
Politoloq vurğulayıb ki, əgər Ermənistan sülh gündəminə sadiqdirsə, o zaman Azərbaycanla sülh müqaviləsi imzalamalıdır: “ABŞ-lə müqavilə bağlamaq, Ermənistanın sülh müqaviləsinə yanaşmasına heç bir töhfə vermir və ona heç bir üstünlük qazandırmır. Ermənistanın yeganə çıxış yolu, Azərbaycanla sülh müqaviləsi imzalamaqdır. Əks halda Ermənistanın hər hansı siyasəti yenə də işğalçılıq siyasəti kimi qiymətləndiriləcək”.
Ə.Bədəlov qeyd edir ki, Ermənistan rəhbərliyi özünə deyil, Fransa, Avropa İttifaqı və indi də ABŞ-ə güvənir. Bu, başqa dövlətlərdə müstəqillik və xoşbəxtlik axtarmaq deməkdir: “İşğalçı Ermənistanın strateji müttəfiqlik təşəbbüsləri nəticə verməyəcək. Çünki onların məqsədi başqa dövlətlərin arasına girməkdir. Balanslaşdırılmış siyasət yürütmək istəyən dövlətlər, ilk növbədə, qonşu dövlətlərlə münasibətləri normallaşdırmalı və sülh müqavilələri imzalamalıdır”.
Maral Şahverdili
08:35 17.01.2025
Oxunuş sayı: 26450
