Şika şəhərinin nümayəndələri Milli Olimpiya Komitəsini ziyarət ediblər
Milli Olimpiya Komitəsinində (MOK) Şika şəhəri meriyasının müşaviri Oie Hideaki, Beynəlxalq Mübadilə Proqramı üzrə koordinator Matsumoto Mariko, Yaponiyanın Azərbaycandakı səfirliyinin 3-cü katibi Higuchu Kazuki və digər nümayəndələrlə görüş keçirilib.
MOK-dan verilən məlumata görə, görüşdə Milli Olimpiya Komitəsinin Beynəlxalq Proqramlar İdarəsinin müdiri Mehman Kərimov, həmin idarənin əməkdaşları Ruslan Məmmədov, Günay Əsgərova və Nərmin Kərimova iştirak ediblər.
Görüşün əsas məqsədi Olimpiya Mədəniyyəti və Təhsil Proqramı (OCEP) çərçivəsində Yaponiya və Milli Olimpiya Komitəsi arasında sıx əməkdaşlığı və bu əməkdaşlığın daha da gücləndirilməsini müzakirə etmək olub.
Mehman Kərimov qonaqlara OCEP layihəsinin tarixi, inkişafı və fəaliyyəti haqqında ətraflı məlumat verib. Görüşdə çıxış edən Şika şəhəri meriyasının müşaviri Oie Hideaki bu əməkdaşlığı yüksək qiymətləndirdiyini bildirib. “Bizim əsas məqsədimiz Azərbaycan ilə Yaponiya arasında təhsil, mədəniyyət və idman sahəsində qarşılıqlı mübadilələrin aparılmasıdır”, - deyə Oie Hideaki qeyd edib.
Bundan sonra tərəflər arasında OCEP çərçivəsində əməkdaşlıq imkanları müzakirə edilib və gələcəkdə birgə layihələrin həyata keçirilməsi barədə fikir mübadiləsi aparılıb.
Olimpiya Mədəniyyəti və Təhsil Proqramına (OCEP) Bakı-2019 Avropa Gənclər Olimpiya Festivalı çərçivəsində start verilib. Beynəlxalq Olimpiya Komitəsinin Olimpiya Həmrəyliyi Fondu və Avropa Olimpiya Komitəsinin dəstəyi ilə həyata keçirilən layihə Elm və Təhsil Nazirliyinin tərəfdaşlığı ilə Milli Olimpiya Komitəsi tərəfindən həyata keçirilir və hazırda dünyanın müxtəlif ölkələrini əhatə edir.
20:30 16.01.2025
Oxunuş sayı: 2038
