"ABŞ-Ermənistan müqaviləsi Tramp administrasiyası dövründə də qüvvədə qala bilər" - AÇIQLAMA
ABŞ ilə Ermənistan arasında imzalanan strateji əməkdaşlıq müqaviləsi, regionda geopolitik gərginliyi artırmaqla yanaşı, müxtəlif sahələrdə əməkdaşlıqla bağlı yeni suallar doğurur. Azərbaycan mediasında bu müqavilənin detallarına dair yayılan məlumatlar artıq təsdiqlənib.
Məsələ ilə bağlı Crossmedia.az-a açıqlama verən Cross Media Təhlil Mərkəzinin analitiki Vüqar Zifəroğlu bildirib ki, ABŞ ilə Ermənistan arasında imzalanan strateji müqavilə Amerikanın Ermənistanı siyasi, iqtisadi, hərbi və texnoloji sahələrdə bir tərəfli şəkildə dəstəklədiyini göstərən sənəd kimi qiymətləndirilə bilər.
"Əslində, bu sənəd ABŞ-nin hazırkı administrasiyasının son illərdə Ermənistan üçün gördüyü dəstəkləri rəsmiləşdirən bir sənəd kimi çıxış edir. Bayden administrasiyası artıq Ermənistana müxtəlif formalarda dəstəyini ifadə etmiş və bu dəstəyi göstərmişdi. Beləliklə, bu müqavilə sadəcə olaraq, Azərbaycan mediasının ABŞ-ın Ermənistana silah tədarük etdiyinə dair məlumatlarını bir daha təsdiq etmiş oldu," – deyə Vüqar Zifəroğlu vurğulayıb.
O əlavə edib ki, ABŞ-nin Ermənistan səhiyyəsinə dəstəyi və birgə təlimlərin planlaşdırılması ilə bağlı xəbərlər həm Azərbaycan, həm də digər ölkələrin mediasında yayımlanmışdı. "Bu müqavilə həmin məlumatların doğruluğunu təsdiqləmiş oldu. Bununla yanaşı, sənəddə bir sıra maraqlı məqamlar var ki, bu məqamlar həm regional, həm də qlobal baxımdan diqqətəlayiqdir".
Vüqar Zifəroğlu sənəddə Ermənistanın təhlükəsizlik sistemlərinin ABŞ-nin nəzarətinə keçməsi məsələsini xüsusi vurğulayıb. O, bu məsələdə Rusiya və İranın reaksiyasının maraq doğurduğunu qeyd edib: "İran, Zəngəzur dəhlizini 'qırmızı xətt' elan edərək, üçüncü qüvvələrin bölgəyə müdaxiləsinə qarşı olduğunu dəfələrlə bəyan edib. Bu kontekstdə İranın mövqeyi olduqca maraqlıdır".
O həmçinin Ermənistanın ABŞ-nin rəhbərlik etdiyi İŞİD-lə mübarizə koalisiyasına qoşulmasını da diqqətə çatdırıb: "Paşinyanın hakimiyyətinin ilk illərində Ermənistan Rusiyanın Suriyadakı hərbi kontingentində təmsil olunmaq barədə qərar qəbul etmişdi. İndi isə bunun tam əksini müşahidə edirik: Ermənistan artıq ABŞ-nin rəhbərlik etdiyi koalisiyada yer alır. ABŞ-nin Suriyadakı fəaliyyəti məlumdur – İŞİD-lə mübarizə adı altında faktiki olaraq PKK/YPG terror qruplaşmalarına hərbi və maliyyə dəstəyi verilir. Bu mənada Ermənistanın bölücü kürd terror qruplaşmalarına dəstək verən koalisiyanın üzvü olması açıq görünür. Bu məsələyə Türkiyənin, təbii ki, bir münasibəti olacaq və bu, olduqca maraq doğurur”.
Zifəroğlu əlavə edib ki, sənəddə iqtisadi və maliyyə nəzarəti ilə bağlı maraqlı məqamlar var. " Sənədin digər maraqlı məqamlarından biri iqtisadi və maliyyə nəzarəti ilə bağlıdır. ABŞ-nin Ermənistanda idxal və ixraca nəzarət mexanizmləri tətbiq edəcəyi məsələsi qeyd olunub. Bu, faktiki olaraq ABŞ-nin Ermənistan iqtisadiyyatını müəyyən dərəcədə nəzarət altına almaq istədiyini göstərir. Qeyd etmək lazımdır ki, Ermənistan iqtisadiyyatı kifayət qədər zəif və mübahisəli bir anlayışdır. ABŞ-nin bu sahədə Ermənistana ciddi dəstək verəcəyi ehtimalı böyükdür," – deyə o bildirib.
“Son olaraq, bu müqavilənin Tramp administrasiyası dövründə necə davam etdiriləcəyi maraq doğurur. Hazırda yayılan məlumatlara əsasən, Bayden administrasiyası bu müqaviləni Trump administrasiyası ilə razılaşdırmışdır. Trampın dövlət katibi vəzifəsinə namizədi Mark Rubio və milli təhlükəsizlik üzrə müşavir Mike Valtz bu sənədin detalları ilə tanışdır. Bu da göstərir ki, müqavilə Trump administrasiyası dövründə də qüvvədə qala bilər, lakin bəzi detalların yenidən nəzərdən keçirilməsi istisna deyil”.- deyə Vüqar Zifəroğlu bildirib.
Nihat Tahirov
12:12 15.01.2025
Oxunuş sayı: 26588
