Rusiya maksimalist hədəflər güdür və işğal etdiyi əraziləri geri qaytarmaq niyyətində deyil - Politoloq
ABŞ Prezidenti Donald Tramp Rusiya-Ukrayna müharibəsinin yaxın vaxtlarda həll olunacağına dair növbəti dəfə optimist açıqlama verib. Vaşinqtonda Con Kennedi adına İfa Sənəti Mərkəzində 2026-cı il dünya çempionatının qrup mərhələsinin püşkatma mərasimində çıxış edən Tramp bildirib ki, onun siyasi fəaliyyətinin mühüm istiqamətlərindən biri münaqişələrin dayandırılması olub. “Mən səkkiz müharibəni bitirmişəm, doqquzuncusu isə yoldadır. Heç kim bunu etməyib”, – deyə ABŞ Prezidenti qeyd edib.
Qeyd etmək lazımdır ki, o, bundan bir neçə gün əvvəl də Rusiya-Ukrayna münaqişəsinin “nəhayət” sona çatacağı barədə bəyanat vermişdi. Trampın bu mövqeyi beynəlxalq ictimaiyyətin diqqətini yenidən müharibənin diplomatik həlli perspektivlərinə yönəldib və prosesə dair gözləntiləri artırıb.
Məsələ ilə bağlı politoloq Aytən Qurbanova Crossmedia.az-la öz fikirlərini bölüşüb:
"Trampın bu mövzuda səsləndirdiyi bəyanatlar az deyil. Xüsusilə nəzərə alsaq ki, o, hakimiyyətə gəldiyi ilk dövrlərdən etibarən Rusiya–Ukrayna müharibəsinin qısa müddətdə başa çatdırılmasını əsas hədəf kimi müəyyənləşdirmişdi və bunu “Tramp planı” çərçivəsində reallaşdırmaq istəmişdi. Lakin təəssüf ki, indiyə qədər atdığı addımların heç biri real nəticə verməyib. Xüsusilə də son təqdim olunan 28 maddəlik sülh planını, daha sonra bu planın 19 maddəyə endirilməsini və ümumilikdə danışıqların uğursuzluğunu nəzərə alsaq- Moskvada keçirilən görüş də bunu deməyə əsas verir ki, plan Rusiya maraqlarını əks etdirən formada təqdim olunmasına baxmayaraq, Moskva müharibənin bitməsində maraqlı deyil.
Rusiya maksimalist hədəflər güdür və işğal etdiyi əraziləri geri qaytarmaq niyyətində deyil. Bu halda Trampın istənilən sülh planını həyata keçirməsi qeyri-mümkündür. Çünki irəli sürülən planın özü mahiyyət etibarilə sərt və birtərəfli xarakter daşıyır. Digər tərəfdən, bu istiqamətdə atılacaq addımlar beynəlxalq sistemdə balansı tamamilə poza, beynəlxalq hüquqi dəyərləri zədələyə bilər. Belə olan halda sülhdən danışmaq real görünmür. Üstəlik, Ukraynanın iştirakı olmadan sülh prosesindən danışmaq ümumiyyətlə mümkün deyil".
Politoloq, həmçinin Trampın son bəyanatının onun sülh planı ilə bağlı müəyyən ümidlərinin qaldığını göstərdiyini qeyd edib:
"Lakin bu plan nə dərəcədə real görünür? Avropa İttifaqının iştirakı olmadan, Ukraynanın razılığı olmadan belə bir təşəbbüs ilin sonunadək həyata keçirilə bilərmi? Fikrimizcə, bu, heç bir halda real deyil".
Elmir Heydərli
09:41 08.12.2025
Oxunuş sayı: 1181
