Fransa Cənubi Qafqazda mövcudluğunu normal səviyyəyə qaldırmaq istəyirsə Azərbaycanla əməkdaşlıq zəruridir - Rəy
Azərbaycanın Xarici İşlər naziri Ceyhun Bayramov Vyanada keçirilən ATƏT Nazirlər Şurasının 32-ci iclası çərçivəsində Fransa Xarici İşlər Nazirliyinin Avropa məsələləri üzrə naziri Benjamin Haddad ilə görüşüb. Görüş zamanı tərəflər Azərbaycan-Fransa münasibətlərinin aktual məsələlərini və gələcək perspektivlərini, regional təhlükəsizlik məsələlərini, həmçinin çoxtərəfli platformalarda əməkdaşlıq imkanlarını müzakirə ediblər.
Azərbaycan və Fransa arasında münasibətlərin normallaşması və bunun region və Azərbaycan üçün potensial üstünlükləri barədə Crossmedia.az saytına açıqlama verən fəlsəfə doktoru, politoloq Məhəmməd Cəbrayılov iki dövlət arasındakı yumşalmanın həm təhlükəsizlik, həm də diplomatik manevr imkanları baxımından Azərbaycanı strateji üstünlüklə təmin etdiyini bildirib : " Son dövrlərdə Azərbaycan-Fransa münasibətlərində müəyyən nisbi yumşalma və normallaşma meylləri müşahidə olunur. Bu, həm təhlükəsizlik, həm də Azərbaycanın diplomatik manevr imkanları baxımından strateji üstünlük yaradır.
Postmünaqişə dövründə, xüsusilə Qarabağ məsələsi ilə bağlı missiya, silahlanma, Avropa Parlamenti və Senatın anti-Azərbaycan qərarları fonunda Azərbaycan-Fransa münasibətlərində kifayət qədər kəskin gərginlik yaranmışdı. Demək olar ki, münasibətlər böhran səviyyəsinə çatmışdı. Bu gərginliyin əsas səbəbi Fransanın açıq şəkildə Ermənistanı birtərəfli qaydada dəstəkləməsi idi.
Vyanadakı görüş göstərir ki, Fransa artıq qarşıdurma strategiyasının məhdudiyyətlərini nəzərə almağa başlayıb. Görüş zamanı mübahisəli məsələlərdə Fransanın keçmişdəki gərginlik fonunu nəzərə alacağı ehtimal olunur. Digər tərəfdən, Azərbaycan kommunikasiyalarını açıq saxlamaqla öz diplomatik üstünlüyünü nümayiş etdirir".
Politoloq, Vyanadakı görüşün Azərbaycan üçün müəyyən üstünlüklər yaratdığını qeyd edib : "Bu görüş Azərbaycanı bir sıra faydalarla təmin edir. Belə ki, Avropa İttifaqı daxilində Azərbaycan tərəfdaşlarını artırmaq və ondan sonra Azərbaycana qarşı aqressiv mövqe tutan ölkələri neytrallaşdırmaq imkanına malik olur. Eyni zamanda, anti-Azərbaycan təsir mexanizmlərinin Avropa Birliyi daxilində effektini zəiflətmək baxımından üstünlük təmin edir.
Enerji və iqtisadi sahələrdə də bu normallaşma Azərbaycanın strateji maraqlarına uyğun üstünlüklər yarada bilər. Məsələn, bərpa və inkişaf layihələrində, xüsusilə Qarabağda fransız kapitalının yatırımı ilə bağlı addımlar atıla bilər. Nəqliyyat layihələri və yaşıl enerji siyasətində də əməkdaşlıq imkanları açılır".
O, bu normallaşmanın regional risklərin azalmasına xidmət etdiyini vurğulayıb: " Geosiyasi baxımdan, bu normallaşma Qərb, Rusiya və Türkiyə balansında regional risklərin azalmasına xidmət edir. Ermənistana münasibətdə Azərbaycanın maraqlarının nəzərə alınması kontekstində bu yumşalma əhəmiyyətlidir.
Təbii ki, Fransa daxilində ermənipərəst dairələrin mövcudluğu davam edir və onların təsiri hiss olunacaq. Lakin Fransa Cənubi Qafqazda əməkdaşlığı normal səviyyəyə gətirmək istəyirsə, Azərbaycanla əməkdaşlıq zəruridir. Çünki Azərbaycan Cənubi Qafqazın əsas və güclü faktorudur, regionda hər hansı əməkdaşlıq onun iştirakı olmadan mümkün deyil".
Sonda M. Cəbrayılov bütün bu faktorların normallaşmanın əhəmiyyətini və görüşlərin strateji üstünlüyünü ortaya çıxardığını bildirib: " Bütün bu amillər Azərbaycan-Fransa münasibətlərində normallaşma prosesinin əhəmiyyətini göstərir və görüşlərin strateji faydasını ortaya qoyur".
Pərvin Hacıyeva
17:32 06.12.2025
Oxunuş sayı: 3064
