"Mirzoyan iki saat əvvəlcədən Moskvaya çağırılar və..." - Ekspert
Ermənistan xarici işlər naziri Ararat Mirzoyanın Rusiyaya səfərinin iki ay öncədən planlaşdırıldığı bildirilib. Bu barədə Ermənistan Xarici İşlər Nazirliyinin mətbuat katibi Ani Badalyan məlumat verib. O, Rusiyanın Xarici İşlər naziri Sergey Lavrovun erməni həmkarını Moskvaya dəvət etməsi ilə bağlı açıqlamasını şərh edərkən, səfərin əvvəlcədən planlaşdırıldığını vurğulayıb. Maraqlıdır, Mirzoyanın başı bu qədərmi qarışıqdır ki, iki ay əvvəlcədən planlaşdırılmış səfəri indiyə qədər reallaşdıra bilmir? Yoxsa, səfərin təxirə salınması Moskvaya növbəti mydan oxumaq cəhdidir?
Mümkün səfər və bunun nəticələri ilə bağlı Crossmedia.az-a danışan politoloq, Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov sözügedən səfərin ABŞ ilə Ermənistan arasında imzalanan “Strateji Tərəfdaşlıq” sazişindən sonra baş verən hadisələrin nəticəsi olduğunu qeyd edib:
“Yanvarın 14-də ABŞ-lə Ermənistan arasında ‘Strateji Tərəfdaşlıq’ müqaviləsi imzalandı. Bu müqavilədən sonra Rusiyadan həm politoloqlar, həm də rəsmilər səviyyəsində Ermənistana qarşı ciddi etirazlar gəldi. Bildirirlər ki, əgər bu müqavilə həyata keçərsə, Avrasiya İqtisadi İttifaqının (Aİİ) ABŞ-dəkı mövqeyi zəifləyəcək. Çünki regionda Rusiya maraqları da var. Bundan sonra bir açıqlama gəldi. Düşünmürəm ki, Ermənistan Xarici İşlər Nazirliyinin bu açıqlaması iki ay öncədən planlaşdırılıb”.
Politoloq, Ermənistanın iki ay öncədən belə uzunmüddətli səfərləri planlaşdırma qabiliyyətində olmadığını ifadə edib:
“Çünki, birincisi, Ermənistan böyük bir dövlət deyil ki, Xarici İşlər Nazirliyi Rusiyaya iki ay öncədən səfər planlaşdırsın. Əgər lazım olsa Mirzoyan iki saat əvvəlcədən Rusiyaya çağırılar və o, gedər. İnanmıram ki, Ermənistan Xarici İşlər Nazirliyi elə bir gücə sahibdir ki, belə uzunmüddətli planlaşma etsin".
S.Hümbətov səfərin sırf erməni ictimaiyyətinə verilən bir açıqlama kimi təqdim edildiyini vurğulayıb:
“Çünki Ermənistan XİN Rusiyanın dəvəti ilə ora gedə bilər və diplomatik kanallarla deyər ki, bu görüş keçirilməlidir. Təbii ki, bu müqavilənin imzalanması Rusiyanın maraqlarına uyğun deyil. Rusiyayla hansısa məsələnin aydınlaşdırılması üçün bu səfər ola bilər”.
Sonda politoloq bildirib ki, səfərin ABŞ-lə strateji tərəfdaşlıq müqaviləsi bağlandıqdan sonra Rusiyanın aqressiyasını azaltmaq məqsədilə verilən ani qərarlardan biri olduğunu düşünmək daha məntiqli olar:
“Amma bu səfəri “biz birdən-birə çağırıldıq, getdik” kimi deyil, “iki ay öncədən planlaşdırılmışdı” deyə təqdim etmək manipulyasiya xarakteri daşıyır. Bu səfər, ABŞ-la strateji tərəfdaşlıq müqaviləsi bağlandıqdan sonra Rusiyanın aqressiyasını azaltmaq üçün verilən ani qərarlardan biri kimi dəyərləndirilə bilər”.
Maral Şahverdili
08:20 15.01.2025
Oxunuş sayı: 2977
