Bu dəfə metapnevmovirus “kabusu”: COVİD-li günlərə geri qayıdırıq? - Həkim açıqladı
Son zamanlar dünyada müzakiə olunas əsas mövzulardan biri metapnevmovirusla bağlıdır. Dünyanın ayrı- ayrı ölkələrində sözügedən virusa yoluxanların sayı artır. Bu, insanlarda “kabusun” yenidən qayıda biləcəyi narahatlığını yaradır. Doğrudanmı, COVİD-19 pandemiyası dövrünə qayıdacaq, tibbi maska ilə gəzəcək, evdən icazə alaraq çölə çıxacağıq?
Bu barədə Crossmedia.az-a danışan Azərbaycan Tibb Universitetinin Farmakologiya kafedrasının dosenti Aydın Əliyev metapnevmovirusun təxminən 2001-ci ildə aşkarlandığını qeyd edib: “Əsasən, kiçik yaşlı xüsusilə 5 yaşa qədər olan insanlarda bu hallar tez-tez müşahidə olunur. Simptomlarına öskürək, burun axması, təngnəfəslik, qızdırma və üşütmə kimi əlamətlər daxildir. Bu virusun digər viruslardan əsas fərqi aşağı tənəffüs yollarını, bronxları və əsas tənəffüs borularını zədələməsidir. Xəstəlik adətən 3 gündən 7 günə qədər davam edir. Lakin qeyd etmək lazımdır ki, bu virusa qarşı spesifik antivirus preparatı yoxdur. Virusun quruluşu ribonuklein turşusundan (RNT) ibarətdir və ona qarşı xüsusi vaksin mövcud deyil”.
A.Əliyev virusdan qorunmaq üçün insanlara tövsiyə verib: “Sağlam qidalanmaya üstünlük vermək, xüsusilə D vitamini ilə zəngin qidalar qəbul etmək, immunitet sistemini gücləndirmək, insan sıxlığı olan yerlərdən uzaq durmaq, otaqların havasını tez-tez dəyişmək lazımdır. Əgər xəstəlik əlamətləri müşahidə olunarsa, mütləq həkimə müraciət etmək lazımdır. Virus aşağı tənəffüs yollarını zədələdikdə, məsələn, pnevmoniya kimi ağırlaşmalar yarada bilər. Bu halda həkimlər müvafiq terapiya tətbiq edirlər”.
O, qapanmaların hələlik gözlənilmədiyini söyləyib.
Elnurə Kərimova
08:59 14.01.2025
Oxunuş sayı: 10686
