İtaliyada İsrailin tənqidi məhdudlaşdırılır? – Yeni qanun
İtaliya parlamenti antisemitizmlə mübarizəyə yönəlmiş yeni qanunu təsdiqləyib. Qanun İsrailin siyasətini tənqid etmək və fələstinlilərin hüquqlarını müdafiə etmək azadlığını məhdudlaşdıra biləcəyi ilə bağlı mübahisələrə səbəb olub.
Crossmedia.az xəbər verir ki, "Reuters" bu barədə məlumat yayıb.
Noyabrın 17-də parlamentin aşağı palatasında keçirilən səsvermədə 147 deputat qanunun lehinə, 93 deputat əleyhinə səs verib, 5 deputat isə bitərəf qalıb.
Yeni qanun Beynəlxalq Holokost Yaddaşı Alyansının (IHRA) antisemitizm anlayışını əsas götürür. Bu anlayışın izahında İsrailə yönəlmiş bəzi tənqid formaları antisemitizm nümunələri kimi göstərilir.
Müxalifət nümayəndələri və hüquq müdafiəçiləri hesab edirlər ki, qanun İsrail hökumətinin fəaliyyətinin tənqidini və Fələstin xalqının hüquqlarının müdafiəsini məhdudlaşdıra bilər.
Baş nazir Ciorcia Meloninin rəhbərlik etdiyi hakim koalisiya isə bu narahatlıqları rədd edib.
Hakimiyyət nümayəndələri bildiriblər ki, yeni qanun ifadə azadlığını məhdudlaşdırmır və İsrailin siyasi qərarlarının tənqidi hüququ qorunacaq.
Qeyd edək ki, qanunda yeni maliyyə cərimələri və ya cinayət sanksiyaları nəzərdə tutulmur.
14:41 18.11.2026
Oxunuş sayı: 101