Rusiyanın Ukraynada kimyəvi maddədən istifadə etdiyi iddia olunur
Rusiya hərbçilərinin Ukrayna əsgərlərinə qarşı gözyaşardıcı qazdan istifadə etdiyi barədə araşdırmanın nəticələri açıqlanıb.
Crossmedia.az xəbər verir ki, "Associated Press" bu barədə məlumat yayıb.
Bildirilib ki, Ukrayna Kimyəvi Silahların Qadağan Edilməsi Təşkilatının (OPCW) dəstəyi ilə apardığı araşdırmada 2024-cü ilin sentyabrında Rusiya qüvvələrinin pilotsuz uçuş aparatı vasitəsilə Ukrayna hərbçilərinə CS tərkibli gözyaşardıcı qaz qumbarası atdığı müəyyən edilib.
Kimyəvi Silahlar Konvensiyasına əsasən, gözyaşardıcı qazın müharibə zamanı silah kimi istifadəsi qadağandır. Bununla belə, həmin maddədən hüquq-mühafizə orqanlarının iğtişaşlara müdaxiləsi zamanı istifadə edilməsinə icazə verilir.
OPCW daha əvvəl Ukraynanın müxtəlif ərazilərində CS qazının mövcudluğunu təsdiqləsə də, yeni araşdırmada ilk dəfə konkret hadisə Rusiya hərbçiləri ilə əlaqələndirilib.
Araşdırmanın sübutlarından biri kimi Rusiyayönlü "Telegram" kanalında yayılan və dronun Ukrayna hərbçilərinə qaz qumbarası atdığını göstərdiyi bildirilən video təqdim olunub.
Ukrayna tərəfinin məlumatına görə, müharibə dövründə oxşar kimyəvi maddələrdən istifadə ilə bağlı 14 min hadisə qeydə alınıb. Bu hadisələrin təxminən 3 minində hərbçilərin tibbi yardıma ehtiyacı yaranıb.
Araşdırmanın nəticələri OPCW-nin illik iclası ərəfəsində təşkilata üzv olan 193 dövlətə göndərilib.
Rusiya hakimiyyəti yeni hesabatla bağlı hələlik açıqlama verməyib. Moskva daha əvvəl kimyəvi silahdan istifadə ittihamlarını rədd edərək Ukraynanı oxşar əməllərdə günahlandırıb.
13:12 18.11.2026
Oxunuş sayı: 101